«Салауат Юлаев» буллит серияһында ЦСКА-ны еңде

Күсмә уйындар алдынан «Салауат Юлаев»ҡа оҙайлы тәнәфестән һуң Никита Зоркин килеп ҡушылды. Ул октябрь айында ауыр йәрәхәт алғайны. Виктор Козлов тәүге звеноларҙы үҙгәртмәне, ә өсөнсөгә Максим Кузнецов ҡушылды, ә Денис Ян Артем Горшковҡа алмашҡа дүртенсе звеноға күсте.

Уйындың башы юлаевсыларҙың капитаны Григорий Паниндың һөжүмсе Максим Соркинға аяуһыҙ бәрелеүе менән иҫтә ҡалды. Соркин йәрәхәтләнеп уйынды дауам итә алманы. Әммә барыһы ла ҡағиҙәгә ярашлы ине. Ә армеецтарҙың һөжүмсеһе юлаевсы Александр Хохлачевты сәкән менән эткән өсөн штраф алып, командаһын кәмселектә ҡалдырҙы. «Салауат» хоккейсылары дәғүәсенең зонаһына уҡтай атылды. Шелдон Ремпал шайбаны һул яҡтан кинәт уң яҡҡа Жаровскийға оҙатты. Йәш юлаевсы артабан снарядты ҡапҡа янына Джек Родуолдҡа оҙатты. Ул шайбаны бер ҡағылыуҙа ҡапҡаға индерҙе — 1:0.

Икенсе осорҙа мәскәүҙәр уйынды тулыһынса үҙ ҡулына алды һәм Семён Вязовойҙың ҡапҡаһын штурмларға тотондо. Ҡыҫҡа ваҡытта ЦСКА шайбаны 10 тапҡыр ҡапҡаға ырғытты. Өфө командаһы иһә зонанан сыға алманы. Бәхеткә күрә, Вязовой ныҡлы торҙо һәм командаһын бер нисә тапҡыр голдан ҡотҡарҙы. Ярай әле, армеецтар йәнә ике минутлыҡ штраф алды. Күпселек «Салауат»ҡа тағы бер шайба килтерҙе. Был юлы Джек Родуолдтың пасынан һуң Александр Жаровский шайбаны конькиһы менән ҡапҡаға йүнәлтте. Ике период 2:0 иҫәбе менән тамамланды.

Өсөнсө осорҙа хужалар тағы ла әүҙемерәк һәм мәргәнерәк уйнай башланы. Осор башында уҡ арммецтар биш минутта ике гол индереп, иҫәпте тигеҙләне — 2:2.

Командалар төп ваҡытта ла, овертаймда ла еңеүсене асыҡлай алманы. Семен Вязовой буллит серияһында ла оҫта уйнаны һәм бер шайбаны ла ҡапҡаһына үткәрмәне. «Салауат»тың составында иһә Шелдон Ремпал гол индереп, Бөтә Рәсәй хоккей көнөнә командаһына еңеү бүләк итте.

«Салауат Юлаев» командаһы өсөнсө рәттән еңеү яулап һәм 31 уйындан һуң 29 мәрәй менән Көнсығыш конференцияһының турнир таблицаһында 7-се урынға күтәрелде.

Бынан алда «Салауат Юлаев» Астананың «Барыҫ»ын тар-мар иткәйне.