«Салауат Юлаев» Астананың «Барыҫ»ын тар-мар итте

Тәүге минуттарҙа бындай һөҙөмтә булыр, тип уйламаҫлыҡ та ине. Беренсе периодта барыҫтар оҫта уйнаны, хатта 2 минут арауығында Вязовойҙың ҡапҡаһына ике шайба сәпәне. Бәхеткә күрә, тәүге осор бөтөүгә 3 минут ҡалғас, юлаевсылар «Барыҫ»тың ике минутлыҡ штрафы менән файҙалана алды. Беренсе голды үҙ иҫәбенә Девин Броссо яҙҙы.

Икенсе осорҙа ла ҡаҙаҡ-ҡәрҙәштәр өҫтөнлөктө үҙ яғында ҡалдырмаҡсы ине. Һөжүмсе Денис Ян 2 минутҡа уйындан сығарылғандан һуң, улар өсөнсө шайбаны ҡапҡаға индерҙе – 1:3. Әммә артабан уйын көтөлмәгән боролош алды. «Салауат» һөжүм иткән ваҡытта бер-бер артлы өс ҡаҙаҡ уйынсыһы штраф боксына юлланды. Шәп мөмкинлек менән Шелдон Ремпал оҫта файҙаланды. Ул командаға ҡайтыуға бер ай үткәс, тәүге шайбаһын индереп көйәрмәндәрҙе ҡыуандырҙы. Ә бишкә өс уйынында яҡташы Джек Родуолдҡа шәп пас бирҙе һәм иҫәпте тигеҙләне – 3:3. 

Өсөнсө периодта өҫтөнлөк Өфө уйынсылары яғында булды. Осор башында уҡ Александр Хохлачев шайбаны ҡапҡаға оҙатып, уйында тәүге тапҡыр командаһын алға сығарҙы. Әммә «Барыҫ» тешен күрһәтеп маташты әле, был юлы уларға контратакала уңыш йылмайҙы – 4:4. 

Һис шикһеҙ, уйындың төп герой Шелдон Ремпал ине. Ҡаршы яҡтың һөжүменән бер минут үтеүгә ул Астана командаһының ҡапҡаһы янында тотош тамаша күрһәтте. Ҡеүәтле һуғыуҙан һуң шайба инмәгәс, Ремпал уны эләктереп алып ҡапҡа артынан әйләнде һәм кинәт асыҡ мөйөшкә оҙатты. Артабан Артем Пименов был миҙгелдәге тәүге голын индерҙе. Инде өмөттәре ҡалмаһа ла, барыҫтар ҡапҡасыһын алып, өҫтөнлөк алырға тырышты. Тик зонаға ингәндә үк уларҙы Девин Броссо туҡтатты һәм асыҡ ҡапҡаға шайбаны оҙатып, уйынға нөктә ҡуйҙы. 

Еңеүҙән һуң «Салауат Юлаев» туғыҙынсы урынға күтәрелде, барыҫтар иһә 10-сы урынға төштө.