Республикабыҙ көрәшселәре донъя беренселегендә ете миҙал яуланы

Ҡазанда билбау көрәше буйынса донъя беренселеге тамамланды. Республиканың спорт министры вазифаһын башҡарыусы Руслан Хәбибов үҙенең телеграм-каналында хәбәр итеүенсә, Башҡортостан спортсылары ике алтын, өс көмөш һәм ике бронза миҙалға лайыҡ булды.

– Көрәшселәр алдында илебеҙҙең намыҫын лайыҡлы яҡлау бурысы  тора ине. Егеттәребеҙ уңышҡа өлгәште тип иҫәпләйем. Динә Туйгилдина һәм Олимпия Мәхийәнова донъя чемпиондары исемен алһа, Денис Ускомбаев, Рената Шәймөхәмәтова, Дилә Сәмиғуллина – көмөш, Тимур Тимеркәев һәм Владислава Порыева бронза миҙалдар яуланы, – тип билдәләне спорт министры.

Иҫегеҙгә төшөрәбеҙ, билбау көрәше буйынса донъя беренселеге Ҡазанда уҙҙы. Унда донъяның 30 иленән 300-ҙән ашыу спортсы ҡатнашты.

Бынан алда «Башинформ» Башҡортостан көрәшселәренең донъя чемпионатында дүрт миҙалға лайыҡ булыуы хаҡында яҙғайны.

https://www.bashinform.ru/news/sport/2024-11-18/bortsy-na-poyasah-iz-bashkirii-zavoevali-sem-medaley-na-pervenstve-mira-4012543