Радий Хәбиров Пекиндағы Олимпиадала бронза миҙал яулаған Семен Елистратовты ҡотланы

Өфө шорт-трексыһы Семен Елистратов Пекиндағы Олимпия уйындарында 1500 метр дистанцияла бронза миҙал яуланы. Ул Рәсәйҙең йыйылма командаһына ун беренсе миҙал килтерҙе.

«Беҙҙең Семен Елистратов Пекинда шорт-трек буйынса 1500 метр дистанцияла бронза алды! Семенды, барыһын да ҡотлайым!» — тип яҙҙы Башҡортостан Башлығы Радий Хәбиров социаль селтәрҙәге сәхифәһендә.

Алтын наградаға — Көньяҡ Кореянан Хван Дэ Хон, көмөш миҙалға Канаданан Стивен Дюбуа лайыҡ булды.

Семен Елистратов — 2014 йылда эстафетала олимпия чемпионы, 2018 йылғы Олимпия уйындарында бронза призёр, 2015 йылда донъя чемпионы, донъя чемпионаттарында ике тапҡыр көмөш призёр, донъя чемпионаттарында биш тапҡыр бронза призёр; күп тапҡыр Европа чемпионы; 1000 метрлыҡ дистанцияла Донъя кубогын яуланы. Был иһә Семёндың карьераһында дүртенсе Олимпиада.

https://www.bashinform.ru/news/sport/2022-02-09/semen-elistratov-zavoeval-bronzu-na-olimpiade-2022-v-pekine-2686577