Республикала Өфө – Инйәр – Белорет юлы төҙөкләндерелә

Белорет районында «Йәшәү өсөн инфраструктура» милли проектын бойомға ашырыу барышында Өфө — Инйәр — Белорет юлының 6 саҡрымдан ашыуын ремонтлайҙар. Был хаҡта Башҡортостандың Транспорт министрлығынан хәбәр иттеләр.

Һүҙ Рәүәт һәм Олойылға ауылдары эргәһендәге ике участка тураһында бара. Юл эшселәре бында асфальт-бетон япмаһын яңырта, юл ситтәрен нығыта һәм тамғалар һыҙа. Эштәр көндәр яҡшырғас башлана.

Өфө — Инйәр — Белорет юлы – Башҡортостанда бик популяр туристик йүнәлеш. Ошо трасса буйлап Белорет, Архангел һәм Ҡырмыҫҡалы райондарының хозур урындарына (Көньяҡ Урал тәбиғәт ҡурсаулығына, Атыш шарлауығына, «Абҙаҡ» тау саңғыһы курортына һәм башҡаларға) барып етергә мөмкин.

«Бында хәрәкәт бик тығыҙ — тәүлегенә 12 мең автомобилгә етә», — тине Башҡортостандың транспорт һәм юл хужалығы министры Любовь Минакова.

Юлдың ике участкаһында ремонт эштәрен 2026 йылдың аҙағына тиклем тамамлау планлаштырыла.

Хәтерегеҙгә төшөрәбеҙ, быйыл «Йәшәү өсөн инфраструктура» милли проекты буйынса 200 саҡрымға яҡын төбәк һәм муниципаль-ара юлдар төҙөкләндерелә. Шуларҙың 170 саҡрымы терәк юл селтәренә инә.

https://www.bashinform.ru/news/nacproject/2026-04-09/v-bashkirii-otremontiruyut-dorogu-ufa-inzer-beloretsk-4645907

Яҡташыбыҙҙың балаларына 1,8 миллион һум бурысы йыйылған

Ир алимент түләмәҫ өсөн Татарстанға ҡасҡан.

Туймазыла приставтар 1987 йылғы ирҙе эҙләй. Уның балаларына алимент буйынса 1,8 миллион һумдан ашыу бурысы бар.

Ир суд приставтары хеҙмәтенә килмәй, ҡайҙалыр ҡасып йөрөй, йәшәгән урыны билдәһеҙ. Яҡташыбыҙҙың Татарстандың Әлмәт ҡалаһында булыуы ихтимал.

Уның ҡайҙалығы хаҡында ниндәй ҙә булһа мәғлүмәткә эйә булғандарҙан 8 (987) 587 26 16, 8 (347) 273-56-40 телефондары буйынса Рәсәй Суд приставтары федераль хеҙмәтенең Башҡортостан буйынса баш идаралығының дежур бүлегенә хәбәр итеүҙәрен һорайҙар.

https://www.bashinform.ru/news/politics/2026-04-09/zhitel-bashkirii-zadolzhal-detyam-1-8-mln-rubley-4645972

Өфө мәктәптәрендә һуңғы ҡыңғырау көнө билдәле булды

Быйыл ул бер көнгә һуңыраҡ була.

26 майҙа Өфө мәктәптәрендә һуңғы ҡыңғырау яңғырай.

«Башҡортостан Мәғариф министрлығының «2025-2026 уҡыу йылында сығарылыш кисәләренең берҙәм даталары тураһында» хатын иғтибарға алып, 2026 йылдың 26 майында 11-се класты тамамлаусылар өсөн уҡыу йылының тамамланыуына арналған «Һуңғы ҡыңғырау» байрамын ойошторорға һәм үткәрергә ҡарар итәм», — тиелә «Башинформ»дың ҡарамағындағы документта.

Яуаплы кешеләргә һәм ведомстволарға «Һуңғы ҡыңғырау» үткәргәндә уҡыусыларҙың ғүмерен һәм һаулығын һаҡлау, бәлиғ булмағандар араһында хоҡуҡ боҙоу факттарына юл ҡуймау буйынса саралар күрергә тәҡдим ителде.

Ә инде 1 июндән 9-сы һәм 11-се кластарҙы төп дәүләт имтиханы һәм берҙәм дәүләт имтиханы тапшыра башлай.

https://www.bashinform.ru/news/obrazovanie/2026-04-09/nazvana-data-poslednego-zvonka-v-shkolah-ufy-4646036

Башҡортостан Башлығы олимпиадаларҙа уҡыусыларҙың яңы уңыштары хаҡында һөйләне

Өфө һәм Туймазы уҡыусылары экология һәм йәмғиәтте өйрәнеү буйынса ярыштарҙа призер булды.

Вологда өлкәһендә экология буйынса олимпиаданың йомғаҡлау этабы үтте, унда Башҡортостандан һигеҙ уҡыусы ҡатнашты. Республика Башлығы Радий Хәбиров һүҙҙәренсә, Өфөнән өс ҡыҙ — 2-се «Смарт» полилингваль гимназияһы уҡыусыһы Рилана Кәримова, 106-сы «Берҙәмлек» лицейы вәкиле Ғәлиә Әүәлбаева һәм 93-сө физика-математика лицейы уҡыусыһы София Салангина ошо олимпиаданың призеры булды.  

«София менән беҙ таныш, былтыр ул климаттың үҙгәреүе мәсьәләләренә һәм экология проблемаларына арналған халыҡ-ара олимпиадала (IOCE) еңеү яуланы, – тип ғорурланып һөйләне Радий Хәбиров. – Уҡыусыларыбыҙ Татарстанда йәмғиәтте өйрәнеү фәне буйынса йомғаҡлау этабында ла яҡшы сығыш яһаны. Бында Рената Жданова (155-се лицей, Өфө), Мария Ворсина (7-се мәктәп, Өфө), Мария Калеева (3-сө гимназия, Өфө), Аделина Дәүләтбаева (3-сө гимназия, Өфө) һәм Эмилия Сәлимйәнова (6-сы мәктәп, Туймазы) призлы урын алды».

Республика етәксеһе һүҙҙәренсә, уҡыусылар йәмғиәтте өйрәнеү фәненән олимпиадаға «Аврора» таланттарҙы үҫтереү үҙәгенең «Аврора. Осош» проекты сиктәрендә әҙерләнгән.

«Һәләтле балалар менән системалы һәм үтә мөһим эште мотлаҡ дауам итербеҙ. Тотош республикала йәш таланттарҙың яңы үрҙәргә өлгәшеү мөмкинлеге булыуы мөһим», — тип билдәләне Башҡортостан Башлығы.

https://www.bashinform.ru/news/obrazovanie/2026-04-09/glava-bashkirii-rasskazal-o-novyh-uspehah-shkolnikov-na-olimpiadah-4645953

Башҡортостанда рөхсәтһеҙ сауҙа итеү урындарында бер нәмә лә һатып алмаҫҡа кәңәш итәләр

Өфө мэрияһында рөхсәтһеҙ сауҙа итеү урындарында бер нәмә лә һатып алмаҫҡа кәңәш итәләр.

Яҙ етеү менән Өфө урамдарында аҙыҡ-түлек, шул иҫәптән тоҙланған йәшелсәләрҙе законһыҙ һатыу осраҡтары арта бара.

«Бындай урындарҙа тауар ҡағиҙәләрҙе һәм санитар нормаларҙы боҙоп һатыла, ә һатыусыларҙың сифатты раҫлаған документтары юҡ», — тип белдерҙеләр Өфө мэрияһында. 

Ҡулдан нимәлер һатып алғанда, кеше үҙенең һәм яҡындарының һаулығын хәүеф аҫтына ҡуя. Был продукттар төрлө йоғошло ауырыуҙарға сәбәпсе булырға мөмкин.

Ҡаланың ҡулланыусылар баҙары, туризм һәм ҡулланыусыларҙың хоҡуҡтарын яҡлау идаралығы рөхсәтһеҙ сауҙа итеү урындарында һатып алыуҙан тыйылырға һәм улар тураһында +7 (3472) 77-09-11 номеры буйынса хәбәр итергә саҡыра.

https://www.bashinform.ru/news/social/2026-04-09/v-bashkirii-sovetuyut-nichego-ne-pokupat-v-mestah-stihiynoy-torgovli-4646033

Өфө парктарында талпандарға ҡаршы көрәш башлана

Өфө парктары һәм скверҙары талпандан эшкәртелә, тип хәбәр иттеләр мэрияла.

Был эштәрҙе Республика дезинфекция үҙәге хеҙмәткәрҙәре башҡара.  

«Эшкәртеү 13 апрелдән башлана», — тип асыҡлыҡ индерҙеләр муниципалитетта.

Исемлектә парктар, скверҙар, аллеялар, «Өфө муйынсағы» һуҡмаҡтары бар. Бөтәһе 100-гә яҡын урын. Йорт яны һәм төрлө ойошмаларҙың биләмәләре был исемлеккә инмәй.

«Халыҡҡа хәүефһеҙ һәм Рәсәй территорияһында рөхсәт ителгән заманса препараттар ҡулланыла. Эштәр башлыса төнгө һәм иртәнге сәғәттәрҙә, һауа торошо яҡшы булғанда башҡарыла, шуға графикка төҙәтмәләр индерелеүе ихтимал», — тип белдерҙеләр Өфө мэрияһында.

Өҫтәмә мәғлүмәтте дезинфекция үҙәге сайтында табырға мөмкин.

Хәтерегеҙгә төшөрәбеҙ, Башҡортостан – талпан энцефалиты буйынса эндемик төбәк. Был сир буйынса 42 район хәүефле тип иҫәпләнә, тип яҙғайны «Башинформ».

https://www.bashinform.ru/news/social/2026-04-09/ufimskie-parki-zhdet-obrabotka-ot-kleschey-4645791

Республикала «Атай ҡаһарманлығы» премияһына ғаризалар ҡабул ителә

8 апрелдән «Атай ҡаһарманлығы-2026» республика конкурсына ғаризалар ҡабул итеү башланды. Был хаҡта Дәүләт Йыйылышы — Ҡоролтайҙа 2025 йылда республиканың граждандар йәмғиәте торошо тураһында докладҡа арналған матбуғат конференцияһында республиканың Йәмәғәт палатаһы рәйесе Энйы Әхмәҙуллина белдерҙе.

Конкурста республикабыҙҙа кәмендә биш йыл даими йәшәгән һәм балаларын лайыҡлы тәрбиәләгән атайҙар ҡатнаша ала. Еңеүселәргә күкрәккә тағыла торған билдә, диплом һәм иҫтәлекле бүләктәр тапшырыла.

«Атайҙар үҙҙәре ғариза бирергә ҡыйынһына, беҙ республика муниципалитеттары йәмәғәтселәрен яң яҡшыларҙы асыҡлап, ғариза тултырырға ярҙам итергә саҡырабыҙ, ҡушылығыҙ, иң лайыҡлылар еңһен», — тип билдәләне Ынйы Әхмәҙуллина.

Ғаризалар 1 авгусҡа тиклем ҡабул ителә. Ҡатнашыусы анкетаһын бында тултырырға мөмкин. Хәтерегеҙгә төшөрәбеҙ, Башҡортостанда «Атай ҡаһарманлығы» наградаһы 2020 йылдан тапшырыла. Уҙған биш йылда конкурста 1000-дән ашыу атай ҡатнашҡан, уларҙың 200-гә яҡыны лауреат исеменә лайыҡ булған.

https://www.bashinform.ru/news/social/2026-04-08/v-bashkirii-startoval-priem-zayavok-na-soiskanie-premii-ottsovskaya-doblest-4644716

Башҡортостандан ветеран-хәрби хәбәрселәр шифахана-курорттарҙа дауаланырға мөмкин

Башҡортостан Башлығы Радий Хәбиров МХО-ла ҡатнашыусыларға һәм уларҙың ғаиләләренә ярҙам сараларын киңәйтеү тураһында указға ҡул ҡуйҙы. «Башинформ» ҡарамағында ошондай документ бар.

Бойороҡҡа ярашлы, шифахана-курорттарҙа дауаланыу хоҡуғы киң мәғлүмәт саралары хеҙмәткәрҙәренең билдәле бер категорияларына – республиканың хәрби журналистика ветерандарына бирелә.

Хәтерегеҙгә төшөрәбеҙ, 2025 йылда Башҡортостанда республика етәксеһе башланғысы менән илдә тәүге хәрби хәбәрселәр тураһында закон әҙерләнде һәм ҡабул ителде. Ул хәрби журналист, хәрби журналистика ветераны статусын билдәләй, шулай уҡ дәүләт ярҙамы сараларын билдәләй.

«Башинформ» мәғлүмәт агентлығы хәбәрсеһе Эдуард Ҡусҡарбәковҡа беренсе булып хәрби хәбәрсе танытмаһы тапшырылды. Шулай уҡ ул алғы һыҙыҡтағы эше өсөн генерал Шайморатов миҙалы менән бүләкләнде. Был юғары дәүләт наградаһын журналист Сочиҙа үткән XXVII «Бөтә Рәсәй — 2023» хәҙерге журналистика форумында Башҡортостан Башлығы Радий Хәбиров ҡулынан алды.

https://www.bashinform.ru/news/svo/2026-04-08/veterany-voenkory-iz-bashkirii-smogut-poluchit-sanatorno-kurortnoe-lechenie-4645053

Республика мәҙәниәт министрының элекке урынбаҫары төп концерт залы етәксеһе итеп тәғәйенләнде

Башҡортостан мәҙәниәт министрының элекке урынбаҫары Илнур Мөхйәнов «Башҡортостан» дәүләт концерт залы директоры вазифаһын башҡарыусы итеп тәғәйенләнде. Кисә уны коллектив менән таныштырҙылар.

Илнур Мөхйәнов 2022 йылдың ғинуарынан 2025 йылдың сентябренә тиклем мәҙәниәт министры урынбаҫары булып эшләй. Хеҙмәт юлын Ул Башҡорт дәүләт филармонияһында башлай. Һуңынан Ишембай районының мәҙәниәт бүлеген етәкләй, хакимиәт башлығының социаль мәсьәләләр буйынса урынбаҫары вазифаһын биләй. 2019-2022 йылдарҙа Башҡортостан Башлығы идаралығында урындағы үҙидара органдары менән эшләү буйынса баш кәңәшсе була.

https://www.bashinform.ru/news/culture/2026-04-08/v-bashkirii-eks-zamministra-kultury-vozglavil-glavnyy-kontsertnyy-zal-4644709

«Башҡорт» позывнойлы яугир дуҫтары менән МХО-ға киткән

Өфөнән «Башҡорт» позывнойлы хәрби хеҙмәткәр дуҫтары менән махсус операция зонаһына хеҙмәт итергә киткән. Уның менән Сибай ҡалаһы хакимиәте башлығы Сергей Озерцов осрашты.

Мэр һүҙҙәренсә, «Башҡорт» армияла хеҙмәт итмәһә лә, Ватан һағына баҫҡан. Бындай етди ҡарарҙы ул дуҫтары менән бергә ҡабул иткән. Бер йыл эсендә хәрби хәрәкәттәр зонаһында ул штурм подразделениеһы яугиренән командирға тиклем юл үткән.

Яҡташыбыҙға 28 йәш. Ул сығышы менән Сибайҙан, Рамаҙан Өмөтбаев исемендәге Башҡорт лицейын һәм Ишембай нефть колледжын тамамлаған.

«Ул Сибайҙа йәшәгән туғандарына бер нисә көнгә генә килде һәм Өфөгә ғаиләһе янына ҡайтырға ашыҡты, сөнки уны ҡатыны һәм йәш ярымлыҡ ҡыҙы көтә ине, — тине Сергей Озерцов. — Герой булып тыумайҙар, ә булалар. «Башҡорт» – беҙҙең замандың ысын геройы».

https://www.bashinform.ru/news/svo/2026-04-07/voennosluzhaschiy-s-pozyvnym-bashkir-otpravilsya-na-svo-vmeste-s-druzyami-4643009

Башҡортостан орлоҡ экспортын ике тапҡырға арттырҙы

Башҡортостандың орлоҡсолоҡ предприятиелары ауыл хужалығы культуралары орлоҡтары экспортын ике тапҡырға тиерлек арттырҙы. Был хаҡта Россельхознадзорҙың республика буйынса идаралығынан хәбәр иттеләр.

2026 йылдың башынан күҙәтеү ведомствоһы Башҡортостан орлоҡсолоҡ хужалыҡтарының ЕС һәм ЕАЭС илдәренә экспорт өсөн әҙерләгән иген һәм мал аҙығы культуралары орлоҡтарының 42 партияһын тикшергән һәм рәсмиләштергән.

Ошо ваҡыт эсендә Беларусь, Германия, Ҡаҙағстан һәм Ҡырғыҙстанға сәсеү өсөн 800,8 тонна кәрешкә, ҡандала үләне, эспарцет, люпин, люцерна, бойҙай, фацелия, шулай уҡ арпа оҙатылған.

«Экспертиза һөҙөмтәләре буйынса карантин организмдары асыҡланмаған, орлоҡтар импортлаусы илдәрҙең карантин фитосанитар талаптарына тап килә», — тип билдәләнеләр Россельхознадзорҙың республика буйынса идаралығында.

Сағыштырыу өсөн. 2025 йылдың ошо уҡ осоронда Башҡортостандан Белоруссияға, Ҡаҙағстанға һәм Ҡырғыҙстанға 444 тонна ауыл хужалығы культуралары орлоғо һатылған.

https://www.bashinform.ru/news/nacproject/2026-04-08/bashkiriya-vdvoe-uvelichila-eksport-semyan-4644530

Республикала көслө ямғыр яуыуы көтөлә

Башҡортостандың Ғәҙәттән тыш хәлдәр буйынса дәүләт комитеты һауа шарттарының үҙгәреүе хаҡында иҫкәртте.

Башгидрометүҙәк мәғлүмәттәре буйынса, йома, 10 апрелдә, республикала ямғыр, көндөҙ урыны менән көслө ямғыр яуыуы көтөлә, ҡайһы бер райондарҙа елдең тиҙлеге секундына 17-22 метрға етеүе ихтимал.

Һауа температураһы көндөҙ +5, +10° тиклем түбәнәйә.

Һауа шарттарының боҙолоуына бәйле мөмкинлек булғанда өйҙә ҡалырға, ә урамда һаҡ булырға кәрәк. Ағастар, реклама таҡталары  һәм электр тапшырыу линиялары янында тормаҫҡа кәңәш ителә.

https://www.bashinform.ru/news/social/2026-04-08/na-bashkiriyu-obrushatsya-silnye-dozhdi-4644474

Башҡортостан прокуроры Игорь Пантюшин вазифаһын ҡалдырҙы

Ул республика прокуратураһына 2021 йылдан башлап етәкселек итте.

Башҡортостан прокуроры Игорь Пантюшин вазифаһын ҡалдырып, Рәсәйҙең генераль прокуратураһына эшкә күсә. «Башинформ» агентлығына үҙенең сығанағы хәбәр итеүенсә, уның граждандарҙың мөрәжәғәттәре буйынса идаралыҡ етәксеһе итеп тәғәйенләнеүе ихтимал. Республиканың күҙәтеү ведомствоһы етәксеһе вазифаһын ваҡытлыса башҡарыу бурысы прокурорҙың беренсе урынбаҫары Евгений Бендовскийға йөкмәтелде.

Хәтерегеҙгә төшөрәбеҙ, Игорь Пантюшин 2021 йылдың декабренән республика прокуратураһына етәкселек итте. Быға тиклем ул Владимир өлкәһе прокуроры булды.

https://www.bashinform.ru/news/social/2026-04-08/prokuror-bashkirii-igor-pantyushin-pokinul-post-4644287

Өфөлә эттәрҙең кешеләргә ташланыу осраҡтары арта

Баш ҡалала берәҙәк эттәрҙең ташланыу осраҡтары арта: бер аҙнала 14 кеше зыян күргән, уларҙың дүртәүһе — балалар.

Йыл башынан ҡаланың Берҙәм дежур-диспетчер хеҙмәтенә хужаһыҙ эттәргә бәйле 839 мөрәжәғәт килгән, был уҙған йылдың ошо уҡ осоро менән сағыштырғанда 82-гә күберәк. Был ваҡыт эсендә 1171 эт (былтыр 863) тотолған. Мэрияла уҙған оператив кәңәшмәлә ҡаланың граждандарҙы яҡлау идаралығы начальнигы Руслан Шәйҙуллин шул хаҡта һөйләне.

Уның һүҙҙәренсә, 88 осраҡ теркәлгән, шуларҙың 17-һе – балалар менән. Сағыштырыу өсөн, былтыр ошондай 2 генә осраҡ булған, уларҙың береһе – бала.

«Һуңғы аҙнала ғына 48 мөрәжәғәт ҡабул ителгән. 152 этте тотҡандар, 14 кеше зыян күргән, шул иҫәптән дүрт бала. Барыһы ла медицина ярҙамы алған һәм травмпункттан ҡайтарып ебәрелгән йәки дауаханаға оҙатылған», — тине Руслан Шәйҙуллин.

Ҡала властары халыҡты һаҡ булырға һәм хужаһыҙ йөрөгән эттәр тураһында ЕДДС телефонына хәбәр итергә саҡыра.

https://www.bashinform.ru/news/law/2026-04-08/v-ufe-sobaki-massovo-napadayut-na-lyudey-4643813

Башҡортостанда IV «Китап байрамы» көнө билдәле булды

Быйыл дүртенсе «Китап байрамы» халыҡ-ара китап йәрминкәһе 28-30 майҙа ойошторола. Быйыл йәрминкә тәүге тапҡыр республиканың барлыҡ муниципалитеттарында үткәрелә. Башҡортостандың мәҙәниәт министры урынбаҫары Наталья Лапшина коллегияның киңәйтелгән ултырышында ошо турала белдерҙе.

Китап календары төҙөлә һәм уға муниципалитеттарҙың китап мәҙәниәтенә арналған барлыҡ саралары индерелә.

«Сараларҙы 27 майҙа, Китапханалар көнөндә башларға тәҡдим итәбеҙ. Календарь 1 майға тиклем әҙер булырға тейеш», — тип билдәләне Наталья Лапшина.

https://www.bashinform.ru/news/culture/2026-04-08/stalo-izvestno-kogda-v-bashkirii-sostoitsya-iv-knizhnaya-yarmarka-kitap-bayram-4644051

Өфөлә Башҡортостандың мәҙәниәт министры кәңәшселәре менән таныштырҙылар

Өфөлә Башҡортостан Мәҙәниәт министрлығы коллегияһының киңәйтелгән ултырышында республика мәҙәниәт министрының дүрт кәңәшсеһе менән таныштырҙылар.

Улар – Наталья Абдразаҡова, AY YOLA төркөмө артистары Ринат Рамазанов, Руслан Шәйхетдинов һәм хәрби дирижер Азат Шахмөхәмәтов. Бөгөн коллегияла Наталья Сергеевна ғына ҡатнаша алды.

Министр вазифаһын башҡарыусы Фәнүр Шәйхисламов хәбәр итеүенсә, улар министрлыҡ бойороҡтары менән ағымдағы йылдың февралендә тәғәйенләнгән. Кәңәшселәр үҙ бурыстарын йәмәғәт башланғысында башҡара.

https://www.bashinform.ru/news/culture/2026-04-08/v-ufe-predstavili-sovetnikov-ministra-kultury-bashkirii-4643630

Баш ҡалала 16-сы гимназияла үҫмерҙе ҡулға алған Росгвардия хеҙмәткәрҙәре бүләкләнде

Өфө мэрияһында уҙған оператив кәңәшмәлә 16-сы гимназияла үҫмер уйынсыҡ автомат менән класташтарына һөжүм иткәндән һуң ғәҙәттән тыш хәл урынына беренсе булып килеп еткән Росгвардия хеҙмәткәрҙәре бүләкләнде. Мэр Ратмир Мәүлиев полиция старшинаһы, 1-се полиция батальоны водителе Дмитрий Агибаловҡа һәм полиция кесе сержанты, Росгвардия идаралығы 1-се полиция батальонының өлкән полицейскийы Никита Толстыхҡа ҡала хакимиәтенең рәхмәт хаттарын тапшырҙы.

«Бик күп ялған мәғлүмәттәр таралды, әммә һеҙ тәүгеләрҙән булып килеп еттегеҙ һәм ғәҙәттән тыш хәл урынында эшегеҙҙе яҡшы башҡарҙығыҙ. Ҡала хакимиәтенән һәм халыҡтан рәхмәт һүҙҙәрен еткерергә теләйем», – тине баш ҡала мэрияһы башлығы.

Хәтерегеҙгә төшөрәбеҙ, ғәҙәттән тыш хәл 3 февралдә көндөҙгө сәғәт 11 сәғәт тирәһендә булды. 9-сы класс уҡыусыларының береһе дәрескә пластик пневматик ҡорал тотоп килгән. Ул уҡытыусыға һәм өс класташына бер нисә тапҡыр атҡан, һуңынан петарда шартлатҡан. Урынға Росгвардия, полиция хеҙмәткәрҙәре килгән. Уҡыусыны тотҡанда ул ҡаршылыҡ күрһәтмәгән.

https://www.bashinform.ru/news/social/2026-04-08/v-ufe-nagradili-rosgvardeytsev-zaderzhavshih-podrostka-v-gimnazii-16-4643829

Республикала һауа торошо боҙола

Ошо көндәрҙә республикала үҙгәреүсән һауа торошо көтөлә, тип хәбәр итте Башҡортостан синоптиктары.

Башгидромет мәғлүмәттәре буйынса, аҙнаның икенсе яртыһында болотло һәм ямғырлы һауа торошо көтөлә, 10 апрелдә урыны менән көслө ямғыр яуыуы мөмкин.

«Төндә температура +3, +8° тиклем күтәрелә, ә көндөҙгө температура +6, +11° була. Ял көндәрендә яуым-төшөм ихтималлығы кәмей, көндөҙ һауа температураһы күтәрелә», — тип билдәләне Башҡортостан синоптиктары.

https://www.bashinform.ru/news/social/2026-04-08/v-bashkirii-uhudshitsya-pogoda-4643478

Башҡортостанда төндә «Ракета хәүефе» режимы индерелде

Бөгөн төнгө 2 тула 10 минутта Башҡортостан биләмәһендә ракета хәүефе режимы иғлан ителде. «Өфө» халыҡ-ара аэропортында һауа судноларын ҡабул итеүгә һәм сығарыуға сикләүҙәр индерелде.

Яҡынса 50 минут үткәс, төнгө 3 тула 15 минут тирәһендә Башҡортостандың Ғәҙәттән тыш хәлдәр буйынса дәүләт комитеты башлығы Кирилл Первов «Ракета хәүефе» режимының ғәмәлдән сығыуы тураһында белдерҙе. Шул уҡ ваҡытта Өфө аэропортында осоштарҙы ваҡытлыса сикләүҙәр алынды.

«Өфө» халыҡ-ара аэропортының онлайн-таблоһына ҡарағанда, хәҙер аэропорт ғәҙәти режимда эшләй.

Бөгөн төндә Башҡортостан менән күрше төбәктәрҙә лә «Ракета хәүефе» режимы индерелгәйне. Улар араһында – Татарстан, Һамар, Ырымбур өлкәләре, Удмуртия һәм башҡалар.

https://www.bashinform.ru/news/law/2026-04-08/v-bashkirii-nochyu-vvodili-rezhim-raketnaya-opasnost-4643450

Өфөнән ағалы-ҡустылы спортсылар теннис буйынса халыҡ-ара турнирҙа алтын миҙал алды

Өфөнән ағалы-ҡустылы Виктор һәм Михей Сидоровтар коляскала теннис буйынса халыҡ-ара турнирҙа еңеүсе булды. Башҡортостан спортсыларының еңеүе тураһында республика хөкүмәте вице-премьеры — спорт министры Руслан Хәбибов хәбәр итә.

Абруйлы ярыш Көньяҡ Кореяның Пусан ҡалаһында үтте. Унда донъяның 10-дан ашыу иленән, шул иҫәптән Англия, Бразилия, Япония һәм Ҡытай спортсылары ҡатнашты.

Рәсәй исеменән 4 спортсы ғына сығыш яһаны, уларҙың икәүһе – Башҡортостандан. Парлы разряд финалында Виктор һәм Михей турнир хужалары, Көньяҡ Корея тенниссыларын еңде. Яңғыҙ разрядта Михей Сидоров шулай уҡ Көньяҡ Корея спортсыһын еңеп, алтын миҙал яуланы.

«Адаптив спорт беҙҙе яҡшы яңылыҡтар менән ҡыуандырыуын дауам итә. Виктор һәм Михей Сидоровтар йылдан-йыл яҡшы һөҙөмтәләр күрһәтә», — тип билдәләне Руслан Хәбибов.

https://www.bashinform.ru/news/sport/2026-04-07/bratya-kolyasochniki-iz-ufy-vzyali-zoloto-mezhdunarodnogo-turnira-po-tennisu-4643084

Башҡортостанда йәшәүселәр өсөн яңы Өфө – Владикавказ йүнәлеше асылды

Рейстар аҙнаһына бер тапҡыр – йома көндәрендә башҡарыла.

NordStar авиакомпанияһы Өфө — Владикавказ маршрутына билеттар һата башланы. Осоштар 29 майҙан башлана һәм аҙнаһына бер тапҡыр — йома көндәрендә башҡарыла.

Пассажирҙарҙы заманса һәм уңайлы Boeing 737-800 самолёттары хеҙмәтләндерә. Яңы рейс Өфө халҡына һәм ҡунаҡтарына Төньяҡ Осетияның баш ҡалаһына уңайлы шарттарҙа сәйәхәт итергә мөмкинлек бирәсәк, шулай уҡ төбәктәр араһында эшлекле һәм туристик сәфәрҙәр өсөн мөмкинлектәрҙе киңәйтәсәк.

https://www.bashinform.ru/news/social/2026-04-07/dlya-zhiteley-bashkirii-otkryli-novoe-avianapravlenie-ufa-vladikavkaz-4643002

Өфөлә ятаҡта студенттарға һөжүм иткән үҫмергә арест ваҡыты оҙайтылды

Ул тәфтиш изоляторында ҡала.

Өфөлә Башҡорт дәүләт медицина университеты ятағында студенттарға бысаҡ менән ташланған үҫмергә арест ваҡыты оҙайтылды. Ул 7 июнгә тиклем тәфтиш изоляторында ҡала. Был турала «Башинформ» агентлығына Башҡортостан судтарының берләшкән матбуғат хеҙмәтенән хәбәр иттеләр.

Хәтерегеҙгә төшөрәбеҙ, Башҡортостандың Тәфтиш комитеты үлтерергә маташыу һәм полицейскийҙарға һөжүм итеү тураһында енәйәт эше ҡуҙғатты. Фигурант – үҙен дә йәрәхәтләгән 15 йәшлек үҫмер. Әлеге осраҡтан һуң биш кеше дауаханала ятып сыҡты. Уларҙың барыһына ла тейешле медицина ярҙамы күрһәтелде.

https://www.bashinform.ru/news/law/2026-04-07/podrostku-napavshemu-na-studentov-v-obschezhitii-v-ufe-prodlili-arest-4642511

Өфө блогеры һәм альпинист Рөстәм Нәбиев Эверест тауына артыла

Бөгөн уның экспедицияһы башланды.

Казарма емерелгәндән һуң ике аяҡһыҙ ҡалған Өфө блогеры Рөстәм Нәбиев донъяның иң бейек тауына артылырға әҙерләнә. Бөгөн уның Эвересҡа экспедицияһы башлана. Рөстәм социаль селтәрҙәге сәхифәһенә аэропортта ғаиләһе менән хушлашыу видеоһын һалған.

Блогер яҙылыусыларын экстремаль сәфәргә нисек әҙерләнеүен күрһәтеп барҙы. Уға ҡулдары менән 8,8 мең саҡрым юл үтергә кәрәк.

«2020 йылда Эльбрусҡа менгән Рөстәм алты йылдан һуң ер шарының иң бейек нөктәһенә юл тотор тип кем уйлаһын.  Алда беҙҙе уникаль сәйәхәт көтә. Мин был аҙымға аңлы рәүештә килдем», – тип социаль селтәрҙә үҙенең фекерҙәре менән уртаҡлашҡан альпинист.

Хәтерегеҙгә төшөрәбеҙ, Рөстәм Нәбиев – донъяла ҡулдары менән генә (башҡаларҙың ярҙамынан тыш) тауҙарға күтәрелгән беренсе һәм берҙән-бер кеше. Биш йылда яҡташыбыҙ Эльбрустың ике түбәһен (5642 м. /5621 м.), Мөхәббәт түбәһен (2124 м.), Манаслу (8163 м.), Арарат (5165 м.), Казбек (5033м.), Килиманджаро (5895 м.), Аконкагуа (6962 м.) һәм Ирәмәл (1589 м.) тауҙарын яулаған.

https://www.bashinform.ru/news/social/2026-04-07/ufimskiy-bloger-i-alpinist-rustam-nabiev-vzoydet-na-everest-4642540

Аксаков күлендә балыҡтар күпләп һәләк булған

Ҡырмыҫҡалы районының Аксаков (Ҡыйышҡы) күлендә балыҡтар ҡырылған. Ошо көндәрҙә урындағы халыҡ күңелһеҙ күренешкә тап булған һәм Башҡортостандың Экология министрлығына хәбәр иткән. Ведомство белгестәре килеп, тикшереү үткәргән. Ләкин балыҡтарҙың үлеменә сәбәпсе булырҙай бысратыу сығанаҡтарын тапмаған. Был хаҡта «Башинформ» агентлығына республиканың Тәбиғәттән файҙаланыу һәм экология министрлығының матбуғат секретары Ренара Ғәзина хәбәр итте.

Урында күлдең бысраныу кимәлен билдәләү өсөн һыу өлгөһөн анализға алғандар. Лабораторияла тикшергәндән һуң ғына аныҡ һығымта яһарға мөмкин.

https://www.bashinform.ru/news/law/2026-04-07/na-ozere-v-bashkirii-massovo-pogibla-ryba-4642453

Башҡорт милли кейеме – Рәсәйҙең яңы бренды

Интеллектуаль милек буйынса федераль хеҙмәт «Башҡорт милли кейемдәре» географик күрһәтмәһен теркәгән. Был хаҡта Федерация Советының фән, мәғариф һәм мәҙәниәт комитеты рәйесе Лилиә Ғүмәрова хәбәр итте.

Хәҙер республикала теркәлгән 11 бренд иҫәпләнә. Улар араһында – Башҡорт балы һәм Бөрйән солоҡ балы, «Ҡорғаҙаҡ», «Асы» һәм «Йоматау» минераль һыуҙары, «Ҡурай» музыка ҡоралы, Башҡорт аты, Мансур граниты, Башҡорт мамыҡ шәле, Башҡорт балаҫы һәм башҡорт милли кейемдәре.

«Башҡорт костюмы – традицион кейем генә түгел, ә бай тарих һәм күсмә тормош сағылышы», — тип билдәләне Башҡортостандан сенатор Лилиә Ғүмәрова.

Башҡорттарҙың кейемендә Себер, Урал, Волга буйы, Урта Азия, Яҡын һәм Алыҫ Көнсығыш халыҡтары менән бәйләнеш күҙәтелә, ә төрлө төркөмдәргә хас кейем элементтары уларҙың йәшәгән райондарына ҡарап айырыла.

«Брендтарҙы теркәү эшен Рәсәй Федерацияһы сенаторҙары, төбәктәр һәм Роспатент менән берлектә Федерация Советы рәйесе Валентина Матвиенко ҡушыуы буйынса алып барабыҙ. Бөгөнгә реестрҙа илдең төрлө субъекттарынан 413 уникаль тауар теркәлгән, уларҙың һәр береһе – төбәктең визит карточкаһы ғына түгел, ә тотош илдең иҡтисади үҫешенә индергән өлөшө лә», — тип йомғаҡ яһаны Лилиә Ғүмәрова.

Хәтерегеҙгә төшөрәбеҙ, 2020 йылдан Башҡортостанда Милли кейем көнө билдәләнә.

https://www.bashinform.ru/news/politics/2026-04-07/bashkirskiy-natsionalnyy-kostyum-stal-novym-brendom-rossii-4641750

«Башҡортостан ирекмәне» почет билдәһен кем һәм нисек алырға мөмкин

Ғаризалар ҡабул ителә башланы.

Улар МХО яугирҙәре өсөн селтәр үрә, гуманитар ярҙам йыя һәм окоп шәмдәре эшләй. Башҡа тармаҡтарҙан ошондай ирекмәндәр республика етәксеһенең «Башҡортостан Республикаһы ирекмәне» почет билдәһен алыу мөмкинлегенә эйә. Ғаризалар 1 июнгә тиклем ҡабул ителә.

Башҡортостандың йәштәр сәйәсәте министры Вито Сабиров һүҙҙәренсә, был билдәне алыу өсөн республика биләмәһендә бер йылдан ашыу ирекмәнлек эше алып барыу һәм добро.рф порталында верификацияланған ирекмәнлек сәғәте булыу мөһим. 

Документтарҙы түбәндәге адрес буйынса тапшырырға мөмкин: Өфө ҡалаһы, Пушкин урамы, 86, ирекмәндәр хәрәкәте бүлеге. Талап ителгән документтар исемлеге ведомство сайтында баҫылған. Һорауҙар менән Башҡортостандың Добро.рф ресурс үҙәге белгесе Анастасия Грибковаға 7 (937) 321-43-20 телефоны буйынса мөрәжәғәт итергә була.

https://www.bashinform.ru/news/social/2026-04-07/kto-i-kak-mozhet-poluchit-znak-pochetnyy-dobrovolets-bashkirii-4642066

Шаранда ялға ҡайтҡан яугир кәләш алған

Шаран районында «Дәүләт» позывнойлы МХО яугире ҡыҫҡа ваҡытлы ялға ҡайтҡанында һөйгән ҡыҙы Ангелинаға өйләнгән. Улар Шаран ауылы ЗАГС-да никахтарын рәсми теркәгән. Был хаҡта «Башҡорт батальоны» телеграм-каналы хәбәр итә.

Йәштәр ике йыл осрашып йөрөгән. Иҫке Томбағош ауылынан «Дәүләт» 2023 йылдан алып МХО биләмәһендә хеҙмәт итә.

ЗАГС бүлеге хеҙмәткәрҙәре уларға никах таныҡлығын тапшырҙы. Ғаилә башлығы тиҙерәк тыуған яғына еңеү менән ҡайтһын, кәләше менән тыныс тормошта бәхетле ғүмер кисерһен тигән теләктәр яңғыраны.

https://www.bashinform.ru/news/svo/2026-04-06/uchastnik-svo-s-pozyvnym-davlet-zhenilsya-vo-vremya-otpuska-v-bashkirii-4641599

Иглин фермеры граната тапҡан

Хоҡуҡ һаҡлаусылар ваҡиға урынына юлланған.

Фермер Иглин районының Оло Теләк ауылы эргәһендәге баҫыуҙа граната тапҡан. «Честный репортаж» мәғлүмәттәре буйынса, уның янында гильзалар һәм ат амуницияһы ла булған.

Был граната Граждандар һуғышы осоронан бирле шунда ятҡандыр, тип уйлай ул. Әлеге ваҡытта полицейскийҙар һәм саперҙар ваҡиға урынына барырға сыҡҡан. 

https://www.bashinform.ru/news/law/2026-04-06/v-bashkirii-fermer-nashel-granatu-4640918

Башҡортостандың «Тархан» ансамбле Бөтә Рәсәй конкурсында Гран-при яуланы

4 апрелдән 7-нә тиклем Төньяҡ Осетия-Аланияның Владикавказ ҡалаһында «Беҙҙең заман» халыҡ-ара фестиваль үҙәгенең «ВершинаFest» Бөтә Рәсәй сәнғәт конкурсы бара.

Башҡортостандан фестивалдә Туймазы ҡалаһының «Тархан» өлгөлө халыҡ бейеүҙәре ансамбле сығыш яһаны. Коллектив иң юғары наградаға – Гран-приға лайыҡ булды, тип хәбәр итә Республика халыҡ ижады үҙәге.

Ансамбль шулай уҡ «Вайнах бейеүе», «Мираҫ», «Казак бейеүе», «Башҡорт егете бейеүе», «Нараспашку» (ансамблдең йәш солистары Рөстәм Ибраһимов һәм Тимур Шәмсетдинов башҡарыуында) кеүек сағыу сығыштар өсөн I дәрәжә лауреат дипломдарына лайыҡ булды.

Ансамбль етәкселәре Әлфиә һәм Дамир Ибраһимовтар конкурстың «Педагогик оҫталыҡ өсөн» тигән махсус дипломы менән бүләкләнде.

https://www.bashinform.ru/news/culture/2026-04-06/ansambl-tarhan-iz-bashkirii-zavoeval-gran-pri-vserossiyskogo-konkursa-4641051

Ваҡ аҡса тапшырығыҙ: Рәсәйҙә «Тәңкә аҙналығы» башланды

Йыйылған ваҡ аҡсаны 18 апрелгә тиклем алмаштырырға мөмкин.

Был юлы «Тәңкә аҙналығы» 12 көн бара. Үҙәк банк мәғлүмәттәре буйынса, унда 16 меңдән ашыу сауҙа нөктәһе һәм банктарҙың 4 мең бүлексәһе ҡатнаша. Ваҡ аҡсаларҙы ҡағыҙ аҡсаға алмаштырырға йәки үҙеңдең иҫәбенә һалырға мөмкин.

Көҙ көнө үткәрелгән акцияла Башҡортостан халҡы банктарға 756 меңдән ашыу тәңкә тапшырған, уларҙың дөйөм суммаһы – 3,5 миллион һумдан ашыу, ауырлығы 3,6 тонна булған.

https://www.bashinform.ru/news/economy/2026-04-06/nesite-meloch-v-rossii-startovala-monetnaya-nedelya-4640685

Радий Хәбиров Өфө мэрияһына БПЛА-нан зыян күргән йорттарҙы тергеҙергә ҡушты

Өфөлә дрон һөжүменән зыян күргән йортто тергеҙергә һәм пилотһыҙ осоу аппараты менән бәйле башҡа мәсьәләләрҙе хәл итергә кәрәк. Башҡортостан Башлығы Радий Хәбиров баш ҡала мэры Ратмир Мәүлиевҡа ошондай йөкләмә бирҙе.

«Пилотһыҙ хәүеф режимын йышыраҡ иғлан итәбеҙ. 2 апрелдә көслө һөжүм булды. Оборона министрлығына һәм предприятиеларҙы һаҡлау хеҙмәтенә тейешле баһа бирергә кәрәк. Туғыҙ пилотһыҙ осоу аппараты атып төшөрөлдө, берәүһе торлаҡ йортҡа эләкте. Бәхеткә күрә, ҡорбандар юҡ», — тине Радий Хәбиров хөкүмәттең оператив кәңәшмәһендә.

Хәтерегеҙгә төшөрәбеҙ, Өфөлә БПЛА һөжүменән зыян күргән йорттарҙа йәшәүселәргә ярҙам күрһәтелә. Был турала ғәҙәттән тыш хәлдәр буйынса ведомство-ара комиссияһының сираттан тыш ултырышында хәбәр иттеләр.

https://www.bashinform.ru/news/social/2026-04-06/radiy-habirov-poruchil-merii-ufy-vosstanovit-postradavshie-ot-bpla-doma-4640591

Константин Климин Башҡортостан сауҙа министрының беренсе урынбаҫары итеп тәғәйенләнде

Константин Климин Башҡортостан сауҙа һәм хеҙмәттәр министрының беренсе урынбаҫары итеп тәғәйенләнде. Был турала республика етәксеһе Радий Хәбиров хөкүмәттең оператив кәңәшмәһендә иғлан итте.

Бөгөнгә тиклем Константин Климин Рәсәйҙең Белоруссиялағы Сауҙа вәкиллеге ҡарамағында Башҡортостан вәкиле вазифаһын биләне.

Белоруссияла Климин үҙ эшен бик яҡшы башҡарҙы, тип билдәләне Башҡортостан Башлығы.

«Бөгөн бойороҡҡа ҡул ҡуйылды. Уны Башҡортостан сауҙа һәм хеҙмәттәр министрының беренсе урынбаҫары итеп тәғәйенләйбеҙ», — тине Радий Хәбиров һәм Константин Климинға яңы вазифала уңыштар теләне.

https://www.bashinform.ru/news/politics/2026-04-06/pervym-zamministra-torgovli-i-uslug-bashkirii-naznachen-konstantin-klimin-4640593

Республика ветерандарына Еңеү көнө уңайынан аҡса пенсия менән бергә бирелә

Башҡортостанда Бөйөк Ватан һуғышы ветерандарына Еңеү көнө уңайынан аҡса апрель пенсияһы менән бергә түләнә. Рәсәй Пенсия фондының республика буйынса бүлексәһе пособиелар күсерә башланы, тип хәбәр итә ведомствоның матбуғат хеҙмәте.

Быйыл республикала 68 ветеран 10 мең һум алырға тейеш. Аҡса апрель айында банк иҫәбенә йәки почта бүлексәләре аша пенсия менән бергә күсә. Бер ниндәй ҙә ғариза яҙырға кәрәкмәй – түләүҙәр автоматик рәүештә тәғәйенләнә.

Берҙәм бәйләнеш үҙәге телефоны буйынса консультация алырға мөмкин: 8-800-100-00-01 (шылтыратыу бушлай).

https://www.bashinform.ru/news/social/2026-04-06/v-bashkirii-veterany-vov-poluchat-vyplaty-ko-dnyu-pobedy-vmeste-s-pensiey-4640553

Башҡортостандың сауҙа министры Мәскәүгә эшкә күсә

Башҡортостандың сауҙа һәм хеҙмәттәр министры Азат Асҡаров Мәскәүҙә Был хаҡта дүшәмбе республика етәксеһе Радий Хәбиров хөкүмәттең оператив кәңәшмәһендә белдерҙе.

— Азат Әфхәт улы икенсе ҡалаға күсенә һәм яңы вазифала эш башлай. Һеҙгә 19 йыл дәүләт хеҙмәтендә һөҙөмтәле, яуаплы эшләгән өсөн рәхмәт белдерәбеҙ, — тип билдәләне республика етәксеһе. — Һәр вазифала ул бик яуаплы, тыныс, эшлекле кеше булды. Һеҙҙе ихлас ҡотлайбыҙ һәм уңыштар теләйбеҙ!

Башҡортостан Башлығы уны Башҡортостан Республикаһының «Хеҙмәт ҡаһарманлығы өсөн» миҙалы менән бүләкләне.

— Ошондай юғары награда өсөн ҙур рәхмәт, — тине Азат Асҡаров. — 22 йыл элек мин студент булып тышҡы бәйләнештәр һәм сауҙа министрлығына килдем һәм эшкә ҡалдым, хеҙмәт юлым министрлыҡ һәм ведомство ҡарамағындағы учреждение менән бәйле булды.

Экс-министр республика етәкселегенә үҙенә күрһәтелгән ышаныс һәм ярҙам өсөн рәхмәт әйтте.

https://www.bashinform.ru/news/politics/2026-04-06/ministr-torgovli-bashkirii-pokidaet-svoy-post-4640585

Фәйзи Ғәскәров исемендәге халыҡ бейеүҙәре ансамбле гастролдәргә юллана

Рәсәй халыҡтары берҙәмлеге йылында коллектив «Донъя халыҡтары бейеүҙәре» концерт программаһын тәҡдим итә.

5-13 апрелдә Башҡортостандың Фәйзи Ғәскәров исемендәге дәүләт академия халыҡ бейеүҙәре ансамбле Ҡурғанда, Төмәндә, Ханты-Мансиҙа, Нижневартовскиҙа, Лянторҙа, Лангепаста, Когалымда сығыш яһай, тип хәбәр иттеләр «Башинформ» агентлығына республика Мәҙәниәт министрлығының матбуғат хеҙмәтенән.

Ҡурған өлкә филармонияһы, Тимер юлсылар мәҙәниәт йорто (Төмән ҡалаһы), «Октябрь» мәҙәни-ял итеү үҙәге (Ханты-Манси ҡалаһы), Сәнғәт һарайы (Нижневартовск ҡалаһы), «Нефтсе» мәҙәниәт йорто (Лянтор ҡалаһы), «Нефтсе» мәҙәниәт үҙәге (Лангепас ҡалаһы) һәм «Себер» мәҙәниәт йорто (Когалым ҡалаһы) сәхнәләрендә «Донъя халыҡтары бейеүҙәре» программаһын күрһәтә.

«Беҙ – Рәсәй» программаһы ансамбль гастролдәренең географияһын киңәйтте. 2025 йылда Силәбе өлкәһенең Магнитогорск ҡалаһында, шулай уҡ Татарстандың Чистополь, Яр Саллы ҡалаларында, Аҡтанышта концерттар уҙҙы. Беҙҙең коллектив 85 йылдан ашыу халыҡ традицияларын һаҡлап килә. Бындай гастролдәр – Рәсәй тамашасыларын башҡорт халҡының мәҙәниәте менән таныштырыу һәм донъя халыҡтары бейеүҙәрен күрһәтеү өсөн шәп мөмкинлек. Был Рәсәй халыҡтары берҙәмлеге йылында айырыуса символик мәғәнәгә эйә», — тип билдәләне ансамблдең директоры-художество етәксеһе Нәзир Байегетов.

Фәйзи Ғәскәров ансамбленең «Донъя халыҡтары бейеүҙәре» концерт программаһы ЮНЕСКО наградаларына — «Биш ҡитға» алтын миҙалына һәм «Донъя илсеһе» дипломына лайыҡ булған.

Гастролдәр Рәсәй Мәҙәниәт министрлығының Бөтә Рәсәй гастроль-концерт планына ярашлы «Беҙ — Рәсәй» федераль программаһы сиктәрендә ойошторола.

https://www.bashinform.ru/news/culture/2026-04-03/ansambl-narodnogo-tantsa-imeni-fayzi-gaskarova-otpravitsya-na-gastroli-4638759

Йәнә +20°: Башҡортостанда йылы көндәр көтөлә

Башҡортостан синоптиктары алдағы өс көнгә һауа торошон фаразланы.

Башгидромет мәғлүмәттәре буйынса, бөгөн көндөҙ республикала ҡыҫҡа ваҡытлы ямғыр яуыуы көтөлә. Ел көньяҡ-көнбайыштан, көнбайыштан талғын, көндөҙ урыны менән көслө. Һауа температураһы көндөҙ +11, +16°.

Шишәмбе, 7 апрелдә, төндә бер аҙ ямғыр һәм епшек ҡар яуыуы, көндөҙ урыны менән бер аҙ ямғыр яуыуы фаразлана. Ел көньяҡ-көнбайыштан, көнбайыштан талғын, урыны менән көслө. Һауа температураһы төндә -2, +3°, көндөҙ  +12, +17°.

Шаршамбы, 8 апрелдә, республикала яуым-төшөмһөҙ. Ел көнсығыштан, көньяҡ-көнсығыштан талғын. Һауа температураһы -3, +2°, урыны менән +7°, көндөҙ +15, +20°. 

https://www.bashinform.ru/news/social/2026-04-06/i-snova-20-zhiteley-bashkirii-zhdet-ocherednoe-poteplenie-4639922

Башҡортостанға легендар «Еңеү паровозы» килә

Башҡортостанға, шулай уҡ Рәсәйҙең тағы бер нисә төбәгенә легендар «Еңеү паровозы» килә.

Яҙ һайын Башҡортостан, Татарстан, Мордовия, шулай уҡ Һамар, Ырымбур, Ульяновск һәм Пенза өлкәләренең ҙур һәм бәләкәй станцияларына 1945 йылғы Бөйөк Еңеү иҫтәлеге һәм халҡыбыҙ ҡаһарманлығының символдары булған үҙенсәлекле хәрби техника менән ретропоезд килә.

Ошо ваҡыт эсендә «Еңеү паровозы» 15 мең саҡрымдан ашыу юл үтеп, 38 ҡалала булған, тимер юл вокзалдарында байрам сараларында 200 меңдән ашыу кеше ҡатнашҡан.

«Быйыл 25 апрелдән 5 майға тиклем ретропоезд Куйбышев магистраленең 22 тимер юл станцияһына бара. Улар араһында Кинель, Похвистнево, Боғорослан, Өфө, Стәрлетамаҡ, Туймазы, Бөгөлмә, Яр Саллы, Светлое Озеро, Әлмәт, Нурлат, Погрузная, Димитровград, Ульяновск-Үҙәк, Инза, Рузаевка, Пенза-I, Асеевская, Кузнецк, Сызрань-I, Тольятти, Һамар бар», — тип белдерҙеләр тимер юлдың матбуғат хеҙмәтендә.

«Еңеү паровозы» Өфөгә һәм Стәрлетамаҡҡа – 26 апрелдә, Туймазыға 27 апрелдә килә.

Быйыл тәүге тапҡыр Т-70 танкын, 1939 йылғы гаубицаны, 1943 йылғы минометты, «Прага» танкын күрергә мөмкин.

https://www.bashinform.ru/news/social/2026-04-02/v-bashkiriyu-pribudet-legendarnyy-parovoz-pobedy-4637343

Өфөнөң «Мираҫ» ансамбле Татарстанға гастролдәргә сыға

8-15 апрелдә Өфөнөң «Мираҫ» йыр һәм бейеү ансамбле Татарстанда «Донъя ритмдары» концерт программаһы менән сығыш яһай.

Башҡортостан коллективын Лениногорск, Бөгөлмә, Яр Саллы, Мамадыш, Чистополь, Олыяз (Кукмара районы) һәм республиканың баш ҡалаһы Ҡазан сәхнәһендә көтәләр.

«Донъя ритмдары» программаһы төрлө халыҡтарҙың йыр-бейеүҙәрен һәм инструменталь көйҙәрен үҙ эсенә ала. Башҡорт милли уйын ҡоралдары ҡурай һәм ҡыл-ҡумыҙ моңон тыңларға, этник мәҙәниәттәрҙең төрлөлөгөн сағылдырған хореография өлгөләрен һәм сәхнә костюмдарын күрергә мөмкин.

«Мираҫ» ансамбленең Татарстанға гастролдәре изге йолаға әүерелә бара. 2024 йылда республика тамашасылары коллективты йылы ҡабул итте. Быйылғы гастролдәр ике төбәк араһындағы ижади хеҙмәттәшлекте дауам итә һәм тамашасыларҙы ансамблдең репертуары менән таныштыра», — тип хәбәр итә коллективтың матбуғат хеҙмәте.

«Мираҫ» ансамбле «Беҙ – Рәсәй» программаһы сиктәрендә Рәсәй Мәҙәниәт министрлығының Бөтә Рәсәй гастроль-концерт планында ҡатнаша. 2022 йылда коллектив илдең муниципаль ансамблдәре араһында тәүгеләрҙән булып программаға һайлап алынды һәм йыл һайын федераль майҙансыҡтарҙа Башҡортостан мәҙәниәте менән таныштырып, ошо статусты раҫлай.

6+

https://www.bashinform.ru/news/culture/2026-04-02/ufimskiy-ansambl-miras-vystupit-s-gastrolyami-v-tatarstane-4636353

МХО яугиренең ғаиләһендә алтынсы сабый донъяға килгән

Баймаҡ районында «Һунарсы» позывнойлы МХО яугире алтынсы тапҡыр атай булған – уның ҡыҙы тыуған. Бәхетле ғаилә башлығы тыуған яғына ҡыҫҡа ваҡытлы ялға ҡайтҡан. Был турала муниципалитет хакимиәте хәбәр итә.

«Һунарсы» дуҫы һәм класташы менән өлөшләтә мобилизацияның тәүге көндәрендә үк МХО-ға китә. Яҡташыбыҙ — «Урал» машинаһы водителе, яуҙаштарына боеприпастар, аҙыҡ-түлек, кәрәк-яраҡтар ташый.

«Азамат үҙе лә ишле ғаиләлә үҫкән, хәҙер ҡатыны менән алты бала тәрбиәләй. Был ҡыйыулыҡ, яуаплылыҡ, Тыуған илгә һәм ғаиләгә һөйөү өлгөһө булып тора. Ауырлыҡтарға ҡарамаҫтан, ул яҡындары өсөн көс һәм ваҡыт таба», — тип белдерҙеләр район хакимиәтендә.

https://www.bashinform.ru/news/svo/2026-04-03/v-semie-boytsa-svo-iz-bashkirii-rodilsya-shestoy-rebenok-4638189

Рельстан сыҡҡан поезд пассажирҙарының күбеһен Ульяновскиға алып килгәндәр

Тиҙҙән уларҙы маршрут буйынса ебәрәләр.

302-се Мәскәү – Силәбе поезының 352 пассажиры Ульяновск-Үҙәк станцияһына килеп еткән, ҡалғандарын яҡын арала алып килергә тейештәр, тип хәбәр иттеләр Куйбышев тимер юлының матбуғат хеҙмәтенән. Поезда 412 пассажир булған.

Бөтәһе лә туҡланыу менән тәьмин ителә, кәрәк булған осраҡта психологик ярҙам алырға мөмкин. Икенсе поезд әҙер, пассажирҙар медицина тикшереүе үткәндән һуң ул юлға сыға.

Хәбәр иткәнебеҙсә, Мәскәү — Силәбе поезының ете вагоны Ульяновск өлкәһенең Бряндино станцияһында рельстан сыҡҡан. Бер нисә кеше имгәнгән, ҡорбандар юҡ.

https://www.bashinform.ru/news/social/2026-04-03/bolshinstvo-passazhirov-popavshego-v-chp-poezda-dostavleny-v-ulyanovsk-4637962

Республикала асфальт-бетон заводтары эшләй башланы

Башҡортостанда асфальт-бетон заводтары эшләй башлай, тип хәбәр итте транспорт һәм юл хужалығы министры Любовь Минакова.

Уның һүҙҙәренсә, Шишмә районында ҡышҡы консервациянан һуң асфальт-бетон заводы асылған. Яңыртылғандан һуң ул сәғәтенә 60 тоннаға тиклем ҡайнар ҡатнашма етештерә. Республикала тағы бер нисә завод эшләй: Өфөлә, Стәрлетамаҡ һәм Ҡырмыҫҡалы райондарында.

Башҡортостанда бөтәһе 50-гә яҡын асфальт-бетон заводын асыу планлаштырыла, шуларҙың 25-е «Башкиравтодор» акционерҙар йәмғиәтенә ҡарай. Подрядсылар ҡайнар ҡатнашма ярҙамында соҡорҙарҙы ямау эшенә тотонған. 

«Апрель баштарына республика юлдарында 7 меңдән ашыу етешһеҙлек асыҡланған, шуларҙың яртыһы тиерлек бөтөрөлгән. Быйыл 550 саҡрымдан ашыу юлды һәм 15 күперҙе тәртипкә килтереү планлаштырыла, уларҙың дөйөм оҙонлоғо яҡынса 1900 погон метр тәшкил итәсәк», — тип йомғаҡ яһаны Любовь Минакова.

https://www.bashinform.ru/news/economy/2026-04-03/v-bashkirii-vozobnovili-rabotu-asfaltobetonnye-zavody-4637819

Башҡортостанда Яҡуповтар ғаиләһендә туғыҙынсы бала тыуған

Шаран районының Наратаҫты ауылынан Светлана һәм Тимур Яҡуповтарҙың ҙур һәм татыу ғаиләһендә туғыҙынсы сабый донъяға килгән, тип хәбәр иттеләр Башҡортостандың Юстиция эштәре буйынса дәүләт комитетынан.

2026 йылдың 20 мартында Яҡуповтар ғаиләһендә Әҙилә исемле ҡыҙ тыуған. Ағай-апайҙары Даниил (19 йәш), Арина (17 йәш), Милана (14 йәш), Рөстәм (10 йәш), Руслан (9 йәш), Элина (7 йәш), Рамазан (4 йәш) һәм Ралина (2 йәш) һеңлеләрен түҙемһеҙлек менән көтөп алған.

«Яҡуповтар ғаиләһе әүҙем тормош позицияһы яҡлы, республиканың һәм райондың йәмәғәт тормошонда даими ҡатнаша, — тип билдәләнеләр Башҡортостандың Юстиция эштәре буйынса дәүләт комитетында. — 2022 йылда ғаилә башлығы Тимур Яҡупов III «Атай ҡаһарманлығы» республика конкурсында иң йәш еңеүсе тип танылды. 2023 йылда уның хәләл ефете Светлана «Әсәлек даны» миҙалы менән бүләкләнде».

2024 йылда Яҡуповтарҙың өлкән улы Даниил дуҫы менән һыуға батып барған ирҙе ҡотҡарған. Ҡыйыу аҙымы өсөн егеткә Рәсәй Ғәҙәттән тыш хәлдәр министрлығының ведомство наградалары: «Һыуға батыуҙан ҡотҡарған өсөн» һәм «Батырлыҡ өсөн» миҙалдары тапшырылған. Данил шулай уҡ күкрәккә тағыла торған билдә алған һәм «Ҡайнар йөрәк» почетлы китабына индерелгән.

Былтыр йыл аҙағында Башҡортостан Башлығы Радий Хәбиров Яҡуповтарға ғаилә институтын нығытыуҙа һәм балалар тәрбиәләүҙә ҙур ҡаҙаныштары өсөн «Ата-әсәлек даны» ордены миҙалын тапшырғайны.

https://www.bashinform.ru/news/social/2026-04-03/v-proslavlennoy-semie-yakupovyh-iz-bashkirii-rodilsya-devyatyy-rebenok-4637905

Өфөлә Башҡортостандың халыҡ шағиры Роберт Паль арабыҙҙан китте

Башҡортостандың халыҡ шағиры Роберт Паль оҙаҡ ауырығандан һуң 2 апрелдә арабыҙҙан китеп барҙы. Уға 88 йәш тулырға бер нисә көн генә ҡалғайны.

Роберт Паль шиғри йыйынтыҡтар, романдар һәм повестар авторы булараҡ киң билдәле. Уны башҡорт авторҙары әҫәрҙәрен рус теленә тәржемәсе тип беләләр.

Башҡортостан Яҙыусылар союзынан хәбәр итеүҙәренсә, бәхилләшеү сараһы 4 апрелдә көндөҙгө сәғәт 1-се яртыла уҙа (Цветочная, 2А). Шағирҙы Зубов ауылы зыяратына ерләйҙәр.

Роберт Васильевич Паль 1938 йылдың 15 апрелендә Ауырғазы районында тыуған. Стәрлетамаҡ һәм Белорет педагогия училищеларында белем алған. 1961 йылда Башҡорт дәүләт университетын тамамлағандан һуң Ҡырмыҫҡалы районында уҡыта башлай. Һуңынан яҙмыш уны Башҡортостан китап нәшриәтенә алып килә, мөхәррир, редакция мөдире һәм баш мөхәррир булып эшләй. Артабан Роберт Паль республиканың Яҙыусылар союзында әҙәби консультант була. 1998 йылдан «Бельские просторы» журналының бүлек мөдире һәм баш мөхәррир урынбаҫары вазифаһын биләй. 10 йылдан ашыу республика Яҙыусылар союзында рус телле яҙыусыларҙың ижади берекмәһен етәкләй. Хаҡлы ялда да йәмәғәт тормошонда ҡатнашырға тырыша, йәш яҙыусылар менән эшләй.

Уның тәүге шиғырҙары педучилищела уҡыған осорҙа уҡ Стәрлетамаҡ һәм Белорет гәзиттәрендә баҫыла башлай. Роберт Паль оло әҙәбиәткә уҙған быуаттың 60-сы йылдарында килә. 1969 йылда Башҡортостандың Яҙыусылар союзына алына. Шиғриәт, проза һәм нәфис тәржемә жанрҙарында әүҙем эшләй. Уның «Тере мәктәр» исемле тәүге шиғри йыйынтығы 1964 йылда донъя күрә. Артабан уҡыусыларҙан юғары баһа алған «Бейек ялҡын», «Йондоҙ бейеклегенә тиклем», «Яңғыҙ кәкүк саҡырыуы» һәм башҡа шиғыр китаптары сыға. Өфөлә, Мәскәүҙә, Ҡазанда нәшер ителгән 20-нән ашыу шиғри һәм проза китаптары авторы.

Роберт Паль башҡорт шиғриәтен һәм прозаһын рус теленә әүҙем тәржемә итеү менән әүҙем шөғөлләнде. Хәким Ғиләжев, Муса Ғәли, Ғилемдар Рамазанов, Яҡуп Ҡолмой, Рауил Бикбаев, Әнисә Таһированың шиғырҙары, Марат Кәримов, Әхнәф Байрамов һәм башҡа башҡорт яҙыусыларының повестары уның тәржемәһендә баҫылып сыҡты. Роберт Паль әҫәрҙәре украин, ҡаҙаҡ, башҡорт, татар, сыуаш һәм башҡа телдәрҙә донъя күрҙе.

Башҡорт АССР-ның атҡаҙанған мәҙәниәт хеҙмәткәре. Степан Злобин һәм Фәтих Кәрим исемендәге премиялар лауреаты. 2023 йылда Башҡортостандың халыҡ шағиры исеме бирелде.

«Башинформ» мәрхүмдең туғандарының һәм яҡындарының ауыр ҡайғыһын уртаҡлаша.

https://www.bashinform.ru/news/culture/2026-04-03/v-ufe-ushel-iz-zhizni-narodnyy-poet-bashkirii-robert-pal-4637786

Башҡорт теленән халыҡ-ара диктант яҙыу көнө билдәле булды

Быйыл Башҡорт теленән халыҡ-ара диктант 17 апрелдә уҙа. Һәр ваҡыттағыса акция онлайн һәм офлайн уҙғарыла, тип хәбәр итте «Башинформ»ға ойоштороусылар.

Диктант БСТ, «Тамыр» телеканалдарында, «Ашҡаҙар» радиоһында, шулай уҡ рәсми сайтта һәм ойоштороусыларҙың социаль селтәрҙәрендә Өфө ваҡыты буйынса иртәнге сәғәт 11-ҙә башлана. Һәр ҡатнашыусы диктантты өйҙә лә яҙа ала. Эштәрҙе 2026 йылдың 17 апрелендә төнгө бер минуттан 12 тулғансы акцияның рәсми сайты йәки чат-бот аша тапшырырға кәрәк.

Офлайн-форматта ҡатнашыу өсөн акцияның рәсми сайтындағы «Майҙансыҡтар» бүлегендә майҙансыҡ һайларға һәм алдан теркәлергә кәрәк. Акция көнөндә ҡатнашыусылар диктантты үҙҙәре һайлаған майҙансыҡта яҙа.

Быйыл диктант тексы Рәсәй халыҡтары берҙәмлеге йылына, Башҡортостанда Ҙур һәм татыу ғаилә йылына, шулай уҡ башҡорт шағиры һәм мәғрифәтсеһе Ғәли Соҡоройҙоң 200 йыллығына арналған.

Онлайн-форматта ҡатнашыу өсөн акцияның рәсми сайтын (https://bashdictant.ru/) йәки МАКС мессенджерында @bash_dictant_bot чат-ботын файҙаланырға кәрәк.

https://www.bashinform.ru/news/social/2026-04-02/stala-izvestna-data-provedeniya-mezhdunarodnogo-bashkirskogo-diktanta-4637340