Боҙҙа мотоуҙыш буйынса Европа чемпионатының алтын һәм бронза миҙалдары - Башҡортостанда

ӨФӨ, 2017 йыл, 27 февраль. /«Башинформ» мәғлүмәт агентлығы, Николай Ермоленко/. Боҙҙа мотоуҙыш буйынса 21-се Европа чемпионатының алтын һәм бронза миҙалдары Башҡортостан уҙышсыларына тейҙе. Өфөнөң Ғабдрахман Ҡадиров исемендәге техник спорт төрҙәре үҙәге спортсыһы Николай Красников икенсе йыл рәттән Европа чемпионы булды. Бронза миҙалды беренселектең былтырғы көмөш призеры, Стәрлетамаҡ «Каустигынан» Дмитрий Солянников яуланы. Рәсәй уҙышсыларының ҙур ҡаҙанышын Эдуард Крысов (ЦСКА) тулыландырҙы – унда көмөш миҙал.

2017 йылдағы Европа чемпионатының йомғаҡтары.

1. Красников — 32; 2. Крысов — 30; 3. Солянников — 28; 4. Симон — 24; 5. Эбнер — 21; 6. Л. Гутла — 21; 7. Несытых — 21; 8. Нидермайер — 21; 9. Буш — 18; 10. Волейник — 14; 11. Кройцбергер — 11; 12. Сатре — 10; 13. Бауэр — 9; 14. Мяки — 6; 15. Р. Гутла — 3; 16. Кирилов — 3.

Европа чемпионына бүләкте – Башҡортостан Республикаһы йәштәр сәйәсәте һәм спорт министры Андрей Иванюта, ә алтын миҙалды ФИМ-Европа жюри президенты Сюзанна Хюттингер (Австрия) тапшырҙы.

Бүләкләү һуңында Николай Красников үҙенең механиктары Марат Куюков һәм Александр Родинға, шулай уҡ Ғ.Ҡадиров исемендәге техник спорт төрҙәре үҙәгенә рәхмәтен белдереп, үҙенең бөтә чемпионлыҡ гонорарын әлеге ваҡытта ярышташ ғәйебе арҡаһында ҡулы йәрәхәтләнгәндән һуң дауалауға мохтаж Иван Чичиковҡа биреүен белдерҙе.