Башҡортостан клубы тәрбиәләнеүсеһе – боҙҙа мотоуҙыш буйынса донъя чемпионаты лидеры

ӨФӨ, 2017 йыл, 6 февраль. /«Башинформ» мәғлүмәт агентлығы, Николай Ермоленко/. Өфөнөң «Башҡортостан – Ғ.Ҡадиров исемендәге техник спорт төрҙәре үҙәге» тәрбиәләнеүсеһе, хәҙер ЦСКА өсөн сығыш яһаусы Дмитрий Колтаков ике финал этабынан һуң боҙҙа мотоуҙыш буйынса 52-се шәхси донья чемпионатында алдынғы булды. Уның иҫәбендә 37 мәрәй – ғәмәлдәге донъя чемпионы Каменск-Уральскийҙан Дмитрий Хомицевичҡа ҡарағанда берәүгә күберәк.

Икенсе этап еңеүсеһе – Хомицевич, ул һуңғы урауҙа Колтаковты, клубташы Динар Вәлиевты һәм Австрия егете Франц Цорнды уҙҙы. Әммә мәрәй буйынса Колтаковҡа еңелде (18:19), һөҙөмтәлә дөйөм зачетта уны быйылғы Рәсәй чемпионы уҙып китте. Беренсе этаптан һуң ике Дмитрийҙа ла 18-шәр мәрәй ине.

Ҡыҙғанысҡа ҡаршы, Анатолий Степанов исемендәге спорт-техник комплексы боҙонда уҙған икенсе этап урындағы «Мега-Лада» көйәрмәндәренең кәйефен боҙҙо: ярымфиналға уның өс уҙышсыһы үтте, әммә береһе лә финал уҙышына сыҡманы һәм еңеүселәр баҫҡысына күтәрелә алманы. 30 мәрәй менән өсөнсө урын яулаусы Даниил Иванов ике этап буйынса – иң яҡшы уҙышсы, ә бына Стәрлетамаҡ егете Игорь Кононов тик бишенселә генә булды. Ысынында иһә, уның мәрәйе дүртенсе урын яулаусы Динар Вәлиев менән бер тиң – икеһендә лә 28-шәр. Етенселә – «Мега-Ладаның» өсөнсө егете Никита Толокнов – 19 мәрәй. Рәсәй уҙышсылары араһында Франц Цорн 23 мәрәй менән алтынсы урында.

Киләһе ике этап – "финал 2" 11-12 февралдә Шадринск ҡалаһында уҙа. Ойоштороусыларҙың ҡарары буйынса, был этаптарҙа ҡырағай карта буйынса һигеҙ тапҡыр донъя чемпионы Николай Красников сығыш яһаясаҡ.