Стәрлетамаҡтан «Каустик» командаһы Рәсәй чемпионатының бронза миҙалдарына яҡынлашты

ӨФӨ, 2017 йыл, 30 ғинуар. /«Башинформ» мәғлүмәт агентлығы, Николай Ермоленко /. Өфө хакимиәте башлығы Ирек Ялалов баш ҡаланың «Төҙөүсе» стадионында уҙған Суперлига командалары араһында боҙҙа мотоуҙыш буйынса Рәсәй чемпионатының дүртенсе этабы еңеүселәренә бүләктәр тапшырҙы. Икенсе урын яулаусыларҙы – Орджоникидзе районы хакимиәте башлығы Марат Ғәлиуллин, өсөнсөнө Калинин районы хакимиәте башлығы Сергей Кожевников бүләкләне. Ҡыҙғанысҡа ҡаршы, Башҡортостандан еңеүселәр баҫҡысында тик бер генә команда – ул Стәрлетамаҡтан «Каустик». Өс этапта бер юлы өсөнсө урын яулап, «Башҡортостан – Өфөнөң Ғ.Ҡадиров исемендәге техник спорт төрҙәре үҙәген» ике зачет мәрәйенә уҙып, стәрлетамаҡтар бронза миҙалы өсөн көрәштә үҙ урынын нығытты.

Алдағы көндәрҙәге кеүек, Свердловск өлкәһенең Каменск-Уральский ҡалаһынан «Каменск-Уральский техник спорт төрҙәре үҙәге» командаһының уҙышсылары 37 мәрәй менән еңеү яуланы. Тольяттиҙан «Мега-Лада» йәнә икенсе килде – 34 мәрәй, «Каустик» – 28, боҙ хужалары 20 мәрәй менән финишҡа килеп етте.

Тольяттиҙан Даниил Иванов – иң яҡшы шәхси һөҙөмтә күрһәтеүсе – 14 мәрәй, 13-шәр – Өфө егете Николай Красниковта һәм Динар Вәлиевтә, 11 – Дмитрий Хомицевичта (икеһе лә – Каменск-Уральскийҙан).

Алты этаптың дүртеһенән һуң Суперлига турнир таблицаһын 18 мәрәй менән «Уралтрастром – техник спорт төрҙәре үҙәге» етәкләй. Икенселә – «Мега-Лада» (14 мәрәй), өсөнсөлә – «Каустик» (7), дүртенселә – «Башҡортостан – Өфөнөң Ғ.Ҡадиров исемендәге техник спорт төрҙәре үҙәге» (5).

Һуңғы ике этап 25-26 февралдә Тольятти ҡалаһында үтә.