Өфө мэры ата-әсәләрҙән балаларға уларҙың хыялын бүләк итеүҙәрен һораны

Өфө мэры Ратмир Мәүлиев ҡала хакимиәтендә уҙған оператив кәңәшмәлә ата-әсәләрҙән балаларҙың яңы йыл хыялын бойомға ашырыуын һәм уларға шыршы аҫтына үҙҙәре теләгән бүләкте әҙерләп һалыуын һораны. Өфө башлығы бөгөн ҡала мәҙәниәт һарайында һәләтле балалар өсөн ойошторолған шыршы байрамындағы ҡыҙыҡлы хәл тураһында һөйләне.

«Бөгөн иртәлектә Ҡыш бабай бер балаға татлы бүләк тапшырҙы. Ул алды ла мин быға заказ бирмәгәйнем, ти. 31 декабрҙә булыр, тип яуап бирҙе Ҡыш бабай. Шуға күрә ата-әсәләрҙән балаларҙың үтенесен иғтибарһыҙ ҡалдырмауын һорайым. Уларҙы алдарға тырышмаҫҡа, улар хатта нимә яҙғандарын яҡшы хәтерләй, – тине чиновник ҡала хакимиәтендә үткән оператив кәңәшмәлә. –  Балалар мөғжизәгә ышана, әлбиттә. Беҙ ҙә киләһе йыл тағы ла яҡшыраҡ булыр тип ышанабыҙ. Күптән көтөлгән тыныслыҡ килер һәм ир-егеттәребеҙ өйҙәренә ҡайтыр тигән өмөттәбеҙ».

Ратмир Мәүлиев шулай уҡ Өфөнөң ҡала һәм экстрен хеҙмәттәренә яңы йыл байрамдарында ҡала халҡының хәүефһеҙ һәм уңайлы ялы өсөн көсәйтелгән режимда эшләргә кәрәклеген иҫкә төшөрҙө.

https://www.bashinform.ru/news/social/2024-12-24/mer-ufy-poprosil-roditeley-podarit-detyam-ih-mechtu-4065119