Иглин ауылында яңы урта дөйөм белем биреү мәктәбе асылды

Бөгөн, 5 ноябрҙә, Иглин районының Иглин ауылында 7-се яңы урта дөйөм белем биреү мәктәбен асыу тантанаһы уҙҙы.

«Иглин районының халҡы яғынан да йылдам үҫешкән райондарҙың береһе булыуын яҡшы аңлайбыҙ. Был мәктәпте күптән көтөп алдыҡ. Тиҙҙән белем усағы уҡыусылар менән тулыр, шуға күрә икенсеһен төҙөй башларға кәрәк. Хәҙер беҙ ошо хаҡта уйлайбыҙ. Алдағы биш йылда милли проекттар сиктәрендә һеҙгә тағы мәктәптәр төҙөрбөҙ. Медицина учреждениелары һалырбыҙ. Оҙаҡламай Иглиндәге поликлиника буйынса ҡарар ҡабул ителер. Төҙөлөш эштәрен сифатлы башҡарған төҙөүселәргә ҙур рәхмәт. Мин уҡытыусыларға – яҡшы уҡыусылар, ә уҡыусыларға һәйбәт уҡыуҙарын теләйем. Барығыҙҙы ла тағы бер тапҡыр ҡотлайым», – тине Радий Хәбиров.

Мәктәп 1225 уҡыусыға иҫәпләнгән. Был ауыл муниципаль берәмектәрендәге уҡыусы урындары һаны буйынса иң ҙур мәктәп булып тора. Объект төҙөлөшө «Мәғариф» милли проекты сиктәрендә финансланған, федераль бюджет аҡсаһы иҫәбенә 1 миллиард 133 миллион һум йүнәлтелгән.

Төҙөлөш 2023 йылдың 9 мартында башланғайны.

Республика етәксеһе тантананан һуң кабинеттарҙы, ашхананы, спорт залын ҡарап сыҡты, уҡытыусылар һәм уҡыусылар менән аралашты.

Мәктәп директоры Ильяс Закиров һүҙҙәренсә, бында 57 уҡытыусы эшләй, бөгөнгә 37 класта 980 бала уҡый. Киләһе уҡыу йылында иһә 2500 баланы ҡабул итергә әҙерләнәләр.

Уҡыусыларҙың туҡланыуын «Туҡланыу үҙәге» йәмғиәте ойоштора.

Иглин ауылында 6894 бала уҡый, 3365 уҡыусы – икенсе сменала. 7-се мәктәпте сафҡа индереү икенсе сменала белем алған уҡыусылар һанын 2653-кә тиклем кәметергә мөмкинлек бирергә тейеш.

https://www.bashinform.ru/news/social/2024-11-05/v-sele-iglino-bashkirii-otkryli-novuyu-srednyuyu-obscheobrazovatelnuyu-shkolu-3996094