Радий Хәбиров граната шартлатырға йыйынған ир менән булған хәл тураһында: «Уға ярҙам итергә кәрәк»

Башҡортостан Башлығы Радий Хәбиров «Башинформ»ға граната шартлатырға йыйынған ир менән булған хәлгә комментарий бирҙе.

«500-сөләр (дезертирҙар - ред. иҫкәрмәһе) проблемаһы бар, ләкин һәр кем яңылышырға мөмкин. Беҙгә уларҙы хөкөм итәһе түгел. Унда ауыр, ул яңылышҡан һәм законды боҙған - үҙ белдеге менән часты ҡалдырған. Кешесә йәл, әлбиттә. Бөгөн төп маҡсат уның ахмаҡлыҡ ҡылыуына юл ҡуймау ине. Ҡыҙғанысҡа ҡаршы, законды боҙған. Мин уға ярҙам итермен, тинем. Бындай егеттәргә ярҙам итергә кәрәк. Әгәр ҙә һәр кем гранатаға тотона башлаһа, бер ниндәй ҙә хәл итеү юлын таба алмаҫбыҙ. Рәсәй гвардияһы хеҙмәткәрҙәренә рәхмәт, ҡыйыу ир-егеттәр, уның ғүмерен һаҡлап ҡалыу, ахмаҡлыҡ ҡылмаһын өсөн барыһын да эшләне», - тине Башҡортостан Башлығы.

Ир гранатаны бирҙе, уны һорау алыуға алып киттеләр, тип өҫтәне республика етәксеһе.

Хәтерегеҙгә төшөрәбеҙ, Башҡортостан Башлығы Радий Хәбиров менән һөйләшкәндән һуң граната шартлатам тип янаған  элекке хәрби хоҡуҡ һаҡлау органдарына  бирелгән. Шартлатҡысты Рәсәйҙең милли гвардия ғәскәрҙәре хеҙмәткәрҙәренә тапшырғандар.

Рәсәй гвардияһының Башҡортостан Республикаһы буйынса идаралығының матбуғат хеҙмәте хәбәр итеүенсә, боеприпас тикшереүгә ебәрелгән. Зыян күргәндәр юҡ.

https://www.bashinform.ru/news/social/2023-08-02/glava-bashkirii-ob-intsidente-s-vooruzhennym-granatoy-muzhchinoy-nado-emu-pomoch-3370050