Башҡортостандың баш ҡалаһында тәүге яҙғы өмә 31 мартта ойошторола. Мэрияла бөтә предприятиеларҙы, ойошмаларҙы һәм учреждениеларҙы «санитар йома»ла ҡатнашырға һәм тирә-йүнде сүп-сарҙан таҙартырға саҡыралар. Ә өфөләр үҙҙәренең ихаталарын һәм йорт янындағы майҙандарҙы тәртипкә килтерергә мөмкин.
«Күптәр уҙған аҙнала уҡ үҙҙәре эшләгән һәм йәшәгән биләмәләрҙе йыйыштыра башлаһалар ҙа, был «санитар йома» күләмлерәк булырға вәғәҙәләй. Айырыуса сүп-сарҙан таҙартыуға һәм ҡар өйөмдәрен таратыуға иғтибар бирелә.
Торлаҡ-коммуналь хужалыҡтар көн һайын Өфө урамдарын һәм ихаталарын таҙарта. Ләкин күмәк көс менән генә ҡаланы йәмлерәк һәм йәшәү өсөн уңайлыраҡ итергә мөмкин», - тип белдерҙеләр «Башинформ» агентлығына Өфө хакимиәтендә.