Баймаҡ районы Ярат ауылында бөгөн яңы ФАП асылды

«Хәйерле көн, ҡәҙерле дуҫтар. Хәйерле көн, хөрмәтле баймаҡтар. Күптән бында килмәгәйнем. Күршеләргә, Сибайға, туғыҙ мәртәбә килдем, бында өсөнсө мәртәбә генә киләм. Шуға бында проблемалар яйлап йыйылды. Бөгөн кәңәшләшеп бергә уйлайыҡ. Тағы ла нимәләр эшләргә кәрәк? Һеҙгә республиканан тағы ниндәй ярҙам кәрәк булыр? Бөгөн матур итеп ФАПты асайыҡ. Аҙаҡтан, бөгөн мин бында көн буйы эшләйем, һорауҙар булһа, әйҙәгеҙ бергәләп һөйләшеп алайыҡ. Һеҙҙе бөгөн ҡотлайым, ҙур рәхмәт», — тине Радий Хәбиров Ярат ауылында йәшәүселәр алдында башҡорт телендә сығыш яһап.

«Баймаҡ районы Ярат ауылы халҡы өсөн яңы фельдшер-акушерлыҡ пункты күп осраҡта – ҡотолоу сараһы. Хәҙер район үҙәгенә тиклем 46 саҡрым барырға кәрәкмәй, яңы ФАП-та дауалау өсөн бөтә нәмә бар. Иң мөһиме – был фельдшер-акушерлыҡ пунктында фельдшер Ҡунысбаева Динә Урал ҡыҙы эшләй. Ул күптәр өсөн травматолог та, хирург та, невропатолог та булып тора. Бинаның проект-смета документацияһы өсөн аҡсаны халыҡ йыйған. Уларға фермер ярҙам иткән, ләкин башланғыс менән тап халыҡ сығыш яһаған. Яраттарға, бер юлы Башҡортостанда йәшәүселәрҙең һәммәһенә сирләмәүҙәрен, әгәр ауырырға тура килһә, ныҡ һәм ҡыйыу булып ҡалыуҙарын теләйем. Ә беҙ иһә медицинаны үҫтереүгә күп көс һалабыҙ», — тип яҙҙы республика башлығы социаль селтәрҙә ауыл халҡы менән аралашҡандан һуң.