Башҡортостанда иң яҡшы умартасыны һайланылар

ӨФӨ, 2017 йыл, 17 июль. /«Башинформ» мәғлүмәт агентлығы, Галина Бахшиева/. Өфөлә республиканың иң яҡшы умартасыһын һайланылар. XVII республика умартасылар конкурсы йомғаҡтары буйынса Ишембай районынан крәҫтиән (фермер) хужалығы башлығы Илгиз Шәңгәрәев иң яҡшыһы тип танылды. Еңеүсе мөмкин булған 70 балдың 69-ын йыйҙы. Ул 2015 йылда Башҡортостандың абсолют чемпионы, хужалығында 300-ҙән ашыу бал ҡорто күсе, солоҡ умарталары, балауыҙ етештереү буйынса цех һәм умартасылыҡ инвентары магазины бар.

Икенсе урында — Өфө районынан Сулпан Әғләмова, өсөнсөлә — Ғафуриҙан Рәдиф Халиҡов.

Өфө хакимәтенең матбуғат хеҙмәтендә билдәләүҙәренсә, быйыл Башҡортостандың баш ҡалаһы Бөтә Рәсәй бал баш ҡалаһы булыу хоҡуғын яуланы. 15 июлдән 17 авгусҡа тиклем Өфөлә умартасылар араһында федераль кимәлдәге һөнәри оҫталыҡ конкурсы уҙғарыла.