Салауатта иң матур башҡорт ҡыҙын һайлаясаҡтар

ӨФӨ, 2017 йыл, 13 ғинуар./«Башинформ» мәғлүмәт агентлығы, Арина Рәхимҡолова/. Салауатта «Һылыуҡай-2017» ҡала конкурсында ҡатнашыуға ғаризалар ҡабул ителә башланы. Ҡыҙҙар үҙҙәре менән башҡорт телендә таныштырырға тейеш.

Ҡала хакимиәте сайтында хәбәр ителеүенсә, конкурс милли йолаларҙы һәм ғөрөф-ғәҙәттәрҙе пропагандалау, ижади ҡеүәтте асыу һәм йәштәрҙе ижади эшмәкәрлеккә йәлеп итеү маҡсатында уҙғарыла. Бәйгелә 16 йәштән алып 23-кә тиклемге ҡыҙҙар ҡатнаша ала. Тәбиғи матурлыҡтан тыш, улар саф башҡортса һөйләшергә, халҡыбыҙҙың йолаларын һәм ғөрөф-ғәҙәттәрен белергә тейеш. Финалда ҡыҙҙарҙы ижади конкурс, дефиле, портфолио һәм видеопрезентация кеүек һынауҙар көтә. Ул, ғәҙәттәгесә, яҙғыһын уҙа.

Ғаризалар түбәндәге адрес буйынса ҡабул ителә: Салауат ҡалаһы, Ленин урамы, 2, 14-се бүлмә. Электрон почта: otdel.kultury13@mail.ru. Белешмәләр өсөн телефондар: (3476) 35-20-01, 35-21-50.