Башҡорт дәүләт педагогия университеты үҙенең юбилейын билдәләй

ӨФӨ, 10 ғинуар, 2017 йыл. /«Башинформ» мәғлүмәт агентлығы, Эльмира Сабирова/. М. Аҡмулла исемендәге Башҡорт дәүләт педагогия университетының юбилейы. Уны тамамлаусылар, студенттар һәм уҡытыусылар туған юғары уҡыу йортоноң 50 йыллығын билдәләй. Бөгөн Башҡорт дәүләт педагогия университеты – ул заманса мәғариф, фән һәм мәҙәниәт үҙәге, унда 670-ләгән уҡытыусы эшләй, 11 меңдән ашыу студент, аспирант һәм докторант белем ала. Уҡыусылар билдәләүенсә, бында уларға универсаль белем бирәләр, шуға ла юғары уҡыу йортон тамамлаусылар бөтә ерҙә лә талап ителә.

Юғары уҡыу йорто структураһында – биш институт, ете факультет, 47 кафедра.

«50 йыл, бер яҡтан – бай тарихлы, файҙалы тәжрибә туплаған һәм иҫ киткес йолалары менән әһәмиәтле ваҡиға, икенсе яҡтан, университет артабан да әүҙем үҫешә, илебеҙ мәғарифы өсөн әһәмиәтле инновацион белем биреү технологиялары әҙерләй һәм индерә. М. Аҡмулла исемендәге Башҡорт дәүләт педагогия университетының 2016 йылда төрки телле илдәрҙә һәм Шанхай хеҙмәттәшлек ойошмаһы илдәрендә рус телен үҫтереү буйынса төп гуманитар университет исеме алыуы ҙур ҡаҙаныш булып тора», — тиелә Башҡорт дәүләт педагогия университеты ректоры Раил Әсәҙуллиндың ҡотлауында.

Юбилей хөрмәтенә университетта бик күп саралар уҙғарыла: юғары уҡыу йортоноң студенттары һәм профессор-уҡытыусылары ҡатнашлығында байрам флешмобы, КВН-концерты, «Университеттың тарих биттәре» фотокүргәҙмәһе. Бында төрлө йылдарҙа университет тормошоноң төп ҡаҙаныштарын, ваҡиғаларын сағылдырыусы фотолар күрһәтелгән. Һәр кем университеттың барлыҡҡа килеү, студент хәрәкәттәре ойоштороу һәм тәүге уҡыу-уҡытыу корпустарына, дөйөм ятаҡҡа нигеҙ һалыу тураһындағы хәтирәләргә бирелә аласаҡ, тип билдәләнеләр юғары уҡыу йортоноң матбуғат хеҙмәтендә.