Башҡортостандың алты тораҡ пункты Рәсәй Хөкүмәте конкурсында еңеү яуланы

ӨФӨ, 2016 йыл, 21 октябрь. /«Башинформ» мәғлүмәт агентлығы, Ғәлиә Нәбиева/. Башҡортостан ҡалалары һәм ауылдары төҙөкләндереү буйынса конкурстың алты номинацияһының бишәүһендә призерҙар иҫәбендә, тип хәбәр итә РБК-Өфө. Рәсәй Төҙөлөш һәм торлаҡ-коммуналь хужалыҡ министрлығы илдең иң төҙөк тораҡ пункты конкурсы йомғаҡтарын иғлан итте. Алты номинацияла 24 ҡала һәм ауыл еңеүсе тип танылды. Алдан хәбәр ителгәнсә, төбәктәрҙең баш ҡалалары араһында дүрт еңеүсе иҫәбендә Өфө лә бар. Ул Хабаровск менән икенсе урынды биләй, беренселә — Ставрополь, өсөнсөлә — Красноярск. Хәҙер башҡа категорияларҙа Өфөгә республиканың тағы ла биш тораҡ пункты өҫтәлгән.

Һәр номинацияла дүртешәр призер иғлан ителгән. Икенсе категорияла (100 меңдән күберәк кеше йәшәгән ҡалалар) улар иҫәбенә Стәрлетамаҡ һәм Октябрьский инде. Өсөнсөлә (100 меңгә тиклем халҡы булған ҡалалар) — Туймазы. Дүртенселә (биш меңдән ашыу халыҡ йәшәгән ауыл биләмәләре) еңеүселәр араһында Илеш районы үҙәге Үрге Йәркәй ҙә бар. Алтынсы категорияла (өс меңдән кәмерәк халыҡ йәшәгән биләмәләр) Стәрлетамаҡ районындағы Рощинский ауылы билдәләнгән.