Рөстәм Хәмитов Өфө районындағы һабантуйҙа ҡатнашты

Башҡортостан Президенты Рөстәм Хәмитов Николаевка ауылында үткән Өфө районы һабантуйында ҡатнашты. Республика башлығы ауыл эшсәндәрен байрам — баҫыу эштәре тамамланыуы менән ҡотланы һәм Өфө районының төбәктәге иң ҙур райондарҙың береһе булыуын билдәләне.

— Ул миллионлы халҡы булған ҡаланы ҡулса кеүек уратып алған, Өфөнө таҙа һауа һәм аҙыҡ-түлек менән тәьмин итә, — тине Рөстәм Хәмитов. — Һуңғы арала район йылдам үҫешә: ауыл хужалығы тармағы яңы үҫеш темпы алды, яңы инвестиция проекттары тормошҡа ашырыла — былар барыһы ла беҙҙең уртаҡ эште күләмле итә. Ауыл халҡының тормошон еңеләйтер өсөн, республика Хөкүмәте бөтәһен дә эшләргә тырыша — ауыл хужалығы техникаһы һатып алыуҙы субсидиялай, сәсеү һәм ураҡ эштәрендә ярҙам күрһәтә. Өфө районының тағы бер бурысы бар — ул үҙ биләмәһенә сәнәғәт предприятиеларын йәлеп итергә тейеш. Әлеге мәлдә ошо мәсьәлә өҫтөндә эш алып барыла.

Һабантуй тураһында һөйләгәндә, Рөстәм Хәмитов, бөтә донъяла билдәлелек алған халыҡтың яратҡан байрамы бөгөн республиканың тиҫтәләгән районында үтә, тип өҫтәне.

Ошонда уҡ һабантуйҙың төп сәхнәһендә Президент райондың айырыуса ҙур ҡаҙаныштарға өлгәшкән хеҙмәткәрҙәрен бүләкләне.

«Алексеевка» совхозы дәүләт унитар ауыл хужалығы предприятиеһының машина менән һыйыр һауыу операторы Ризида Хәсәнова Башҡортостан Республикаһының Маҡтау грамотаһына лайыҡ булды. «Николаевка» агрофирмаһы тракторсыһы Рафаил Сәитов «Атҡаҙанған ауыл хужалығы хеҙмәткәре» исемен алды.

— Бөгөн иң мөһим байрамдарҙың береһе, — тине хакимиәт башлығы Рәшит Саттаров. — Өфө районы эшсәндәре 35 мең гектарҙан ашыу иген һәм 1000 гектарҙан ашыу картуф сәсте.

Президент 119-сы йылҡы заводының, «Ҡармасан» совхозының, «Өфө» ҡошсолоҡ фабрикаһының, райондағы башҡа предприятиеларҙың тирмәләрен ҡараны.Бынан һуң Өфө районы «Йәйғор» балалар ижад йорто тәрбиәләнеүселәренең биҙәү-ҡулланма сәнғәт эштәре күргәҙмәһе менән танышты.

Өфө районы һабантуйы кискә ҡәҙәр гөрләп торҙо. Байрамды таланттар конкурсы, көрәш, гер спорты, волейбол, мини-футбол, ат сабыштары, халыҡ уйындары биҙәне.