Салауат ҡалаһы мэры вазифаһын ҡалдыра

Салауат ҡалаһы хакимиәте башлығы Альберт Моталов вазифаһын ҡалдыра. Бөгөн уның мэр вазифаһында һуңғы эш көнө. Был хаҡта ул социаль селтәрҙәге сәхифәһендә яҙған. Альберт Моталов ҡала хакимиәтендә йәмғеһе 12 йылдан ашыу эшләгән.

«Салауат үҫешһен, һәр берегеҙ өсөн уңайлыраҡ булһын өсөн намыҫлы эшләргә, эште күңелемде һалып башҡарырға тырыштым. Был йылдар минең өсөн профессиональ ғына түгел, шәхси үҫеш тә булды. Улар оло яуаплылыҡ, көсөргәнешле эш һәм, әлбиттә, Салауат ҡалаһына сикһеҙ һөйөү менән тулы ине», – тип билдәләне ул.

Хәтерегеҙгә төшөрәбеҙ, Альберт Моталов 2024 йылдың ноябрендә ҡала мэры итеп тәғәйенләнгәйне. Быға тиклем ул ҡала хакимиәте башлығының йәшәйеште тәьмин итеү мәсьәләләре буйынса урынбаҫары булды.

Билдәле булыуынса, 45 йәшлек чиновник Салауат ҡалаһында тыуған. Ырымбур дәүләт университетының юридик факультетын, Рәсәй Президенты ҡарамағындағы Рәсәй халыҡ хужалығы һәм дәүләт хеҙмәте академияһын тамамлаған.

Хеҙмәт юлын 2003 йылда Башҡортостан Юстиция министрлығы ҡарамағындағы дәүләт теркәү палатаһының Салауат филиалында төп белгес булып башлай. Шулай уҡ теркәү, кадастр һәм картография федераль хеҙмәте республика буйынса идаралығының ҡала бүлеге белгес-эксперты, дәүләт теркәүсеһе, республика Ер һәм мөлкәт мөнәсәбәттәре министрлығының Салауат ҡалаһы буйынса милек менән идара итеү комитеты рәйесе урынбаҫары булып эшләй.

https://www.bashinform.ru/news/politics/2025-03-27/v-bashkirii-mer-salavata-pokidaet-svoy-post-4174839