Төбәктә 19 июндә һауа торошоноң боҙолоуы көтөлә – Ғәҙәттән тыш хәлдәр министрлығы

РФ Ғәҙәттән тыш хәлдәр министрлығының Башҡортостан Республикаһы буйынса баш идаралығы һауа шарттарының боҙолоу ихтималлығы тураһында хәбәр итә. Кесе йома, 19 июндә, республика буйынса урыны менән ҡойма яуын, йәшен, эре боҙ яуып үтеүе, елдең секундына 20-25 метрға тиклем көсәйеүе ихтимал. «Граждандарҙың һаҡлыҡ сараларын күреүҙәрен, электр тапшырыу линиялары һәм реклама таҡталары менән йәнәш тормаҫҡа тырышыуҙарын һорайбыҙ. Ҡала ситенә сығыуҙан сикләнеп тороғоҙ. Кәрәк булғанда тәҙрәгә, быяла ярсыҡтары осмаһын өсөн, пластырь йәбештерергә мөмкин», — тип кәңәш итттеләр Ғәҙәттән тыш хәлдәр министрлығының матбуғат хеҙмәтендә.