Башҡортостан делегацияһы эш сәфәре менән Белоруссияға юллана

Сәфәрҙә республиканың 40-тан ашыу компанияһы вәкилдәре ҡатнаша. Улар араһында — Башҡортостан сода компанияһы,  «Башхим», Бәләбәйҙең «Автонормаль» заводы, «Салаватстекло», «Башинформсвязь», «Стеклонит», «Искож».

Башҡортостан эшҡыуарҙары Белоруссиялағы хеҙмәттәштәре менән ауыл хужалығы өлкәһендә хеҙмәттәшлек итеүҙе, Башҡортостан Республикаһына Белоруссияла етештерелгән ауыл хужалығы техникаһын килтереү мөмкинлектәрен, күргәҙмә-йәрминкә сараларында ҡатнашыуҙы һәм төбәк-ара хеҙмәттәшлекте тикшерә. Эшлекле делегация вәкилдәре Белоруссия компаниялары менән b2b форматында һөйләшеүҙәр үткәрергә йыйына.

7 декабрҙә эшлекле даирәләр Башҡортостандың иҡтисади һәм инвестиция ҡеүәте менән таныштырыу эшендә ҡатнаша.

Белешмә

2020 йыл йомғаҡтары буйынса Белоруссия Башҡортостандың тышҡы сауҙа әйләнешендә 7,0% өлөш менән дүртенсе урынды биләй. 2021 йылдың ғинуар-сентябрендә тышҡы сауҙа әйләнеше — 217,2 миллион доллар, экспорт — 134,7 миллион доллар, импорт 82,5 миллион доллар тәшкил иткән.