Төркиәлә Өфөнө 2021 йылда 47-се «Апимондия» конгресын уҙғарыу хоҡуғына дәғүәсе сифатында таныштырҙылар

ӨФӨ, 2017 йыл, 2 октябрь. /«Башинформ» мәғлүмәт агентлығы, Ксения Калинина/. 30 сентябрҙә Истамбулда APIEXPO-2017 халыҡ-ара күргәҙмәһе һәм «Апимондия» халыҡ-ара умартасылыҡ ассоциациялары федерацияһы конгресында 2021 йылда Өфөлә 47-се «Апимондия» конгресын һәм «АпиЭкспо» күргәҙмәһен уҙғарыу хоҡуғына Рәсәйҙең ғаризаһы менән таныштырҙылар.

Ғариза менән Рәсәй милли умартасылар союзы президенты Арнольд Бутов, Башҡортостан Хөкүмәте Премьер-министры урынбаҫары Илшат Тажетдинов һәм Башҡортостан министры Руслан Мирсаяпов таныштырҙы, тип аңлаттылар Башҡортостан Конгресс-бюроһының матбуғат хеҙмәтендә.

«Бал – ул Башҡортостандың төп визит карточкаһы, бөтә илгә һәм бөтөн донъяға билдәле бренд, – тине үҙ сығышында вице-премьер Илшат Тажетдинов. – Башҡортостан тауар балын етештереү, бал ҡорто ғаиләләренең иҫәбе, ошо өлкәләге ғилми, мәғариф һәм педагогик эшмәкәрлек буйынса беренсе урынды биләй. Бал һәм башҡа умартасылыҡ продукттары нигеҙендә республикала 250-нән ашыу дауалау, аҙыҡ-түлек продукттары һәм косметик саралар сығарыла. Республикала үҙенсәлекле солоҡсолоҡ умартасылығы үҫешкән».

Рәсәй презентацияһынан тыш Истамбулда Сербияның, Словенияның һәм Данияның ғаризалары менән таныштырыу үтте.

2021 йылда Конгресты һәм күргәҙмәне уҙғарыусы Европа иле 3 октябрҙә билдәләнә.