Өфөлә композитор Абрар Ғабдрахмановтың 90 йыллығына арналған хәтер кисәһе була

Өфөлә билдәле башҡорт композиторы Абрар Ғабдрахмановтың тыуыуына 90 йыл тулыуҙы билдәләйҙәр. Хәтер кисәһе (6+) 22 ноябрҙә Башҡорт дәүләт филармонияһының ҙур залында була. Концерт композиторҙың популяр «Төнгө серенада» йырының бер юлы менән – «Тәҙрәңә төшкән ай нурҙары һағыныу сәләмдәре илтһәсе» тип исемләнгән.

Концертта композиторҙың ғаиләһе — тол ҡатыны, Рәсәйҙең атҡаҙанған һәм Башҡортостандың халыҡ артисы Нажиә Аллаярова, ейәнсәрҙәре — Башҡортостандың халыҡ артисы Дилара Иҙрисова һәм халыҡ-ара конкурстар лауреаты, скрипкасы Асия Ғарипова, шулай уҡ Хор капеллаһы һәм филармония солистары Айгөл Һағынбаева, Алмаз Сирусин, Артур Шәрипов, Илдар Абдуллин, Сәйҙә Ильясова, «Тауыштар» йыр квартеты һәм башҡа артистар ҡатнаша.

«Хәтер кисәһендә атайымдың музыкаль әҫәрҙәре генә түгел, уның мәҡәләләренән, хаттарынан өҙөктәр ҙә яңғырай, — тип һөйләне композиторҙың ҡыҙы, музыка белгесе Миләүшә Иҙрисова. — Шулай уҡ Нажиә Аллаярова тауышына милли кейемдәрҙә дефиле әҙерләнә».

Сценарий авторы һәм алып барыусы – Луиза Фархшатова, ул йырсы тураһында китап һәм ғаилә тураһында фильм авторы. Программаның режиссеры – Дилбәр Фәйзиева.

Абрар Ғабдрахманов (1935 — 2013) – башҡорт композиторы, БАССР-ҙың атҡаҙанған сәнғәт эшмәкәре, Башҡортостандың халыҡ артисы. Бик күп йырҙар, хор, вокаль һәм инструменталь әҫәрҙәр авторы.

https://www.bashinform.ru/news/culture/2025-11-18/v-ufe-sostoitsya-vecher-pamyati-k-90-letiyu-kompozitora-abrara-gabdrahmanova-4471897