Өфөлә Рәшит Шәкүр китабының исем туйы була

20 ноябрҙә Әхмәтзәки Вәлиди исемендәге Милли китапханала «Башҡорт халыҡ ижады хазиналары» китабының исем туйы була. Китаптың авторы һәм төҙөүсеһе – билдәле ғалим-энциклопедист, башҡорт әҙәбиәте аҡһаҡалы, Башҡортостандың халыҡ шағиры, педагог һәм йәмәғәт эшмәкәре, Өфө ҡалаһының почетлы гражданы Рәшит Шәкүр.

Йыйынтыҡҡа йырҙар, риүәйәттәр, легендалар, көйҙәрҙең тарихы, әкиәттәр, мәҡәлдәр, әйтемдәр, йомаҡтар, көләмәстәр, эпик әҫәрҙәр ингән. Быларҙы ул уҙған быуаттың 60-сы йылдарынан башлап, шулай уҡ башҡа сығанаҡтарҙан йыйған. Авторҙың фольклор экспедициялары тураһында яҙмалары «Юлдар миңә йырҙар бүләк итә» тигән айырым бүлектә бирелгән.

– Китаптың тышлығында –  Рәшит Шәкүровтың әсәһе Мәсрүрә Харрас ҡыҙы Шәкүрова-Смаҡова. Уны фотоға 1981 йылда атаһы менән берлектәге экспедиция барышында фоторәссам Рәмил Килмәмәтов төшөргән (Әлшәй районының Ҡармыш ауылы). Эштең исеме – «Йолаларҙы һаҡлаусы», – тип һөйләне проект етәксеһе – Рәшит Шәкүрҙең ҡыҙы, Башҡорт фольклоры фәнни-тикшеренеү үҙәгенең өлкән ғилми хеҙмәткәре Шәүрә Шәкүрова.  

Китап Башҡортостан Республикаһы Башлығы гранттары фонды ярҙамы менән Бөтә донъя башҡорттары ҡоролтайы тарафынан «Ғалим-остаз, фольклорсы Рәшит Шәкүровтың ярты быуатлыҡ яҙыу дәфтәрендә тупланған халыҡ ижады хазиналары» проектына ярашлы донъя күргән.

Китаптың исем туйы көндөҙгө сәғәт 2-лә башлана.

6+

https://www.bashinform.ru/news/culture/2024-11-12/v-ufe-sostoitsya-prezentatsiya-knigi-rashita-shakura-4005167