Республиканың мәҙәниәт министры вазифаһын башҡарыусы генерал Шайморатов ҡәберендә булды

Башҡортостандың мәҙәниәт министры вазифаһын башҡарыусы Әминә Шафиҡова генерал-майор Миңлеғәле Шайморатовтың ҡәберендә булды. Хәтерегеҙгә төшөрәбеҙ, 112-се Башҡорт кавалерия дивизияһының легендар командиры, Рәсәй Геройы 1943 йылда Донбаста һәләк булған.

«Бында ҡоштар һайрамай... Генерал-майор Миңлеғәле Шайморатов батырҙарса һәләк булған урынға барҙыҡ. Еңеү хаҡына яугирҙәребеҙҙең ҡаны түгелгән ерҙә бөтөнләй икенсе хис-тойғолар кисерәһең. Урындағы халыҡ уларҙы хөрмәтләп иҫкә ала, шул көндәрҙәге хәл-ваҡиғаларҙы быуындан- быуынға һөйләп ҡалдыра», —  тип яҙа Шафиҡова үҙенең телеграм-каналында.

«Башинформ» Башҡортостандың мәҙәниәт министры вазифаһын башҡарыусы Әминә Шафиҡованың махсус хәрби операция биләмәһендә республикабыҙ яугирҙәренә мәҙәниәт учреждениелары хеҙмәткәрҙәре йыйған гуманитар ярҙамды тапшырыуы хаҡында хәбәр иткәйне.

https://www.bashinform.ru/news/culture/2024-10-30/i-o-ministra-kultury-bashkirii-posetila-mogilu-generala-shaymuratova-3989130