Башҡортостанда «Башҡорт аты» фестивалендә артистар махсус ижад ителгән йырҙы башҡарасаҡ

Бөгөн Баймаҡ районында Граф күле эргәһендә «Башҡорт аты» III Халыҡ-ара фестивале башланды.

Артистар фестиваль өсөн махсус ижад ителгән йырҙы башҡарасаҡ. Йыр башҡорт халҡын һәм башҡорт атын данлаған сәйәхәтсе егет хаҡында. Тоғро аты уға дөрөҫ юл күрһәтә.

Музыкаль композицияны Вәсил Ғафаров яҙған, һүҙҙәре — Зөһрә Бураҡаева. Йәмғеһе фестивалдә башҡорт атына арналған өс яңы йыр яңғыраясаҡ.

– Беҙҙә һәр ҙур сара театрлаштырылған тамаша менән асыла. Ғәҙәттә, ижади коллектив ғәҙәти булмаған яңы тамаша уйлап сығарырға тырыша, шул иҫәптән музыка һәм вокаль-хореография композициялар йәһәтенән. Режиссер Сулпан Асҡарова «Башҡорт аты» фестиваленә лә яңы композиция яҙыу бурысын ҡуйҙы, ә мин һүҙҙәрҙе халыҡ стиленә ярашлы яҙҙым, йыр юлдары киң билдәле әйтемдән башлана: «Арғымаҡ ат юл башлар, аҡыллы ир ил башлар». Ауыр ваҡытта бик актуаль яңғырай. Вәсил Ғафаров менән күптән эшләйбеҙ, уға артыҡ аңлатыу кәрәкмәй – уй-фекерҙәремде яҙмаларҙан аңлап ҡабул итә. Шулай итеп, ике көндән йыр тыуҙы, уның ғүмере оҙон булыр тип ышанам, — тип һөйләне «Башинформ» агентлығына Зөһрә Бураҡаева.

Фестиваль программаһында «Зәйнетдин» шоу-проекты, «Бишбармаҡ» оркестры, «Рафстайл» барабансылар шоуы һәм диджей Наил Башстайл бар. Шулай уҡ думбырасы Раян Хөснуллин, Тимур Рамаҙанов һәм Зилиә Бәхтиева, шулай уҡ «Сибай», «Уралтау», «Ирандек» халыҡ бейеүҙәре ансамблдәре һәм «Саптар» өлгөлө хореография студияһы, «Эдельвейс» эстрада хореография төркөмө сығыш яһаясаҡ.

Ойоштороусылар «Арғымаҡ ат юл башлар, аҡыллы ир ил башлар» музыкаль-спорт театрлаштырылған тамашаһы әҙерләгән. Спектакль джигитовканы һәм артистарҙың сығыштарын берләштерә.

Автор: Ләйлә Аралбаева

https://www.bashinform.ru/news/social/2024-08-15/v-bashkirii-artisty-spoyut-na-festivale-bashkort-aty-spetsialno-sochinennuyu-pesnyu-3885729