Башҡорт драма театрының спектакле Чечняла «Федерация» фестивалендә ҡатнаша

2024 йылдың сентябрендә Мәжит Ғафури исемендәге Башҡорт академия драма театры Чечен Республикаһының баш ҡалаһында милли театрҙарҙың «Федерация» Бөтә Рәсәй фестивалендә ҡатнаша. Спектакль 10 сентябрҙә Грозныйҙа Х.Нурадилов исемендәге Чечен дәүләт драма театры сәхнәһендә күрһәтелә.

Фестивалдә сығыш яһау өсөн илдең милли театрҙары коллективтарын танылған режиссерҙар, артистар һәм тәнҡитселәр ентекле һайлап ала. Йөҙләгән спектаклдең 10-ға яҡыны ғына финал программаһына индерелә. Улар араһында Айрат Абушахмановтың башҡорт әҙәбиәте классигы Таңсулпан Ғарипованың роман-пенталогияһы буйынса сәхнәләштерелгән «Бөйрәкәй» спектакле лә бар. Хәтерегеҙгә төшөрәбеҙ, быйыл яҙ спектаклдең премьераһы үтте.

— Башҡорт драма театры был фестивалгә ике тапҡыр саҡырылды: 2019 йылда башҡорт театры беренсе фестивалдә «Зөләйха күҙҙәрен аса» спектакле менән ҡатнашты, 2020 йылда иһә «Гөлбостан» спектакле һайлап алынды (ҡыҙғанысҡа ҡаршы, коронавирус пандемияһына бәйле коллектив ҡатнашманы), — тип белдерҙеләр театрҙың матбуғат хеҙмәтендә.

Фестивалде Рәсәйҙең Мәҙәниәт министрлығы, Театр эшмәкәрҙәре союзы һәм Чечен Республикаһы хөкүмәте ойоштора.

https://www.bashinform.ru/news/culture/2024-06-25/spektakl-bashkirskogo-dramteatra-pokazhut-na-festivale-federatsiya-v-chechne-3822372