Башҡортостан һәм Өфө яңылыҡтары
93.44
0
99.58
0
87.29
+0.18
26+ °C
Болотло
Бөтә яңылыҡтар
Мәҙәниәт
11 Март , 16:35

Бында күңел йылыһы һалынған: Диана Гурцкая Өфөнөң һуҡырҙар өсөн китапханаһында булды

Валерий Шахов
Фото:Валерий Шахов

Һаулыҡ мөмкинлектәре сикләнгән кешеләр тураһында хәстәрлек йылында Өфөгә «Йөрәк саҡырыуы буйынса» һуҡыр һәм насар күргән балаларға ярҙам итеү хәйриә фондының попечителлек советын ойоштороусы һәм президенты, «Аҡ таяҡ» халыҡ-ара хәйриә фестивале авторы һәм патронессаһы, йырсы Диана Гурцкая килде. 11 мартта ул IV «АРТ-Ҡоролтай» мәҙәни форумы сараларында ҡатнаша. Диана Гурцкая һәм уның ҡустыһы Роберт башта Мәкәрим Төхвәтшин исемендәге һуҡырҙар өсөн республика махсус китапханаһында булды.

Китапхана директоры Айгөл Әминева ҡунаҡтарға учреждениеның ҡыҙыҡлы залдарын һәм мөйөштәрен күрһәтте, китапхана эшмәкәрлегенең төп йүнәлештәре, күреү мөмкинлектәре сикләнгән кешеләр өсөн уңайлылыҡ менән таныштырҙы.

- Киләһе йылда беҙҙең китапханаға 90 йыл тула, бай тарихыбыҙ бар. Беҙҙә 5 меңдән ашыу уҡыусы, тотош республиканы хеҙмәтләндерәбеҙ. Беҙ социомәҙәни реабилитация үҙәге булып торабыҙ, үҙ эшебеҙ менән бик ғорурланабыҙ. Уҡыусыларыбыҙ бында һәр ваҡыт үҙенә шөғөл таба - компьютер технологияларын үҙләштерә, Брайль шрифтын өйрәнә, кемдер спорт менән шөғөлләнә. Беҙ һуҡырҙар ойошмаһы төҙөгән йорттоң беренсе ҡатында урынлашҡанбыҙ, әлеге ҡат китапханабыҙ өсөн проектланған. Туғыҙ ҡатты ла беҙҙең категорияға ҡараған уҡыусылар биләй, уларға бында төшөү бик уңайлы, - тип һөйләне Айгөл Әминева.

Диана Гурцкая башҡорт Брайль шрифын булдырыусы Мәкәрим Төхвәтшиндың, һуҡыр башҡорт композиторы, Рәсәй Федерацияһының атҡаҙанған сәнғәт эшмәкәре Салауат Низаметдиновтың мемориаль мөйөштәре менән танышты. Йырсы ҡабарынҡы-график һүрәтле брайль китаптарын баҫтырыу өсөн ҡулланылған технология һәм махсус ҡорамалдар, уҡыусыларҙы хеҙмәтләндереү системаһы тураһында белде.

Йырсыны китапханала даими экспонатта булған, һуҡыр һәм насар күргән кешеләр өсөн яраҡлаштырылған күргәҙмә зоналары ҡыҙыҡһындырҙы.

«Нур» балалар үҙәгендә ҡунаҡтарға кескәй һуҡыр уҡыусылар өсөн тактиль китаптар һәм ҡала мөхите макеттары тәҡдим ителде. Диана Гудай ҡыҙы һорауҙар бирҙе, ошондай киңлектәрҙе уңайлы итеп ҡороу тәжрибәһе менән уртаҡлашты. Тауыш яҙҙырыу студияһында Диана Гурцкая «һөйләүсе» китаптар яҙҙырыу тураһында ентекләп һорашты. Уға иҫке брайль баҫмаларының тексын һанлаштырғанда брайль тексын таныу өсөн сканер күрһәтелде.

Экскурсиянан һуң Диана Гурцкая үҙенең тәьҫораттары менән уртаҡлашты:

- Минең Өфөлә тәүге осрашыуым китапханала үтте. Мине һәр ваҡыт китаптар илһамландыра, бер генә бит булһа ла китап уҡымаған көнөм юҡ. Бында күңел йылыһы һалынғаны тойола. Электрон китапхана ла бар, Брайль да, күргәҙмә макеттар ҙа – барыһы ла иҫәпкә алынып эшләнгән, ҙур хәстәрлек күренә. Бында, үҙәк китапханаға, 5 мең кеше килә. Был иһә кешеләрҙең китап уҡырға теләүе һәм яратыуы тураһында һөйләй. Эйе, хәҙер – төрлө технологиялар, компьютерҙар, интернет заманы, әммә китап уҡыу тормошобоҙҙоң айырылғыһыҙ өлөшө булып ҡала.

Диана Гурцкая китапханаға ремонт эшләүҙәрен теләне һәм киләсәктә яңыртылған учреждениеның презентацияһына килергә вәғәҙә бирҙе.

https://www.bashinform.ru/news/culture/2024-03-11/zdes-vlozheny-dusha-i-serdtse-diana-gurtskaya-v-ufe-osmotrela-biblioteku-dlya-slepyh-3676148

Автор:Ләйлә Аралбаева
Читайте нас: