Ғәскәров исемендәге ансамбль Сочиҙа Рәсәй халыҡтарының мәҙәниәте менән таныштырҙы

Фәйзи Ғәскәров исемендәге халыҡ бейеүҙәре ансамбле Сочиҙа мәҙәниәт һәм сәнғәт фестивалендә Рәсәй халыҡтарының мәҙәниәте менән таныштырҙы.

7 июндә Сочиҙа Евразия иҡтисади союзы саммиты сиктәрендә Рәсәйҙең Мәҙәниәт министрлығы булышлығында Евразия халыҡтарының мәҙәниәт һәм сәнғәт фестивале уҙҙы. Уны «Росконцерт» учреждениеһы ойошторҙо.

Фестивалдә Әрмәнстан, Белоруссия, Ҡаҙағстан, Ҡырғыҙстан һәм Рәсәйҙең данлыҡлы милли коллективтары сығыш яһаны. Йыр-бейеү коллективтары һәр илдең үҙенсәлекле мәҙәниәте менән бәйле иң яҡшы концерт номерҙарын күрһәтте.

«Был һоҡланғыс ижади осрашыу булды, төрлө илдәрҙән коллективтар килгәйне. Ошондай күләмле саралар ойошторорға ярҙам иткән Росконцертҡа һәм Мәҙәниәт министрлығына ҙур рәхмәт», - тип билдәләне Сочи башлығы урынбаҫары Елена Канюк.

Рәсәй исеменән фестивалдә Ф.Ғәскәров исемендәге дәүләт академия халыҡ бейеүҙәре ансамбле, М.Е. Пятницкий исемендәге дәүләт академия рус халыҡ хоры һәм Адыгеяның «Нальмэс» дәүләт академия халыҡ бейеүҙәре ансамбле сығыш яһаны.

Ғәскәровсылар фестивалдә Рәсәйҙә йәшәгән өс халыҡтың - коряктарҙың, алтайҙарҙың һәм башҡорттарҙың мәҙәниәте менән таныштырҙы, тип хәбәр иттеләр «Башинформ»ға коллективтың матбуғат хеҙмәтенән.

https://www.bashinform.ru/news/culture/2023-06-08/ansambl-imeni-gaskarova-predstavil-kulturu-narodov-rossii-na-festivale-kultury-i-iskusstv-v-sochi-3292883