Бөрйән районында Алдар батырға мемориаль комплекс асылды

Бөрйән районы Әтек ауылында билдәле башҡорт батыры, тархан, дәүләт эшмәкәре Алдар Иҫәкәев иҫтәлегенә стела асылды. Был хаҡта социаль селтәрҙә урындағы хакимиәт башлығы Ғәзиз Манапов хәбәр итте.

Алдар Иҫәкәев Бөрйән улусы старшинаһы булараҡ билдәле, Ҡаҙағстандың Рәсәйгә ҡушылыуы менән шөғөлләнгән дипломат, Петр I заманында Ҡырым һәм Азов походтарында ҡатнашҡан. Хәрби хеҙмәттәре өсөн нәҫелдән нәҫелгә күсә килгән тархан исемен алған.

«Ул үҙ халҡы өсөн ғүмерен фиҙа ҡылған. Алдар батыр исеме беҙҙең рухты артабан да күтәрер, балаларыбыҙҙа ла илһөйәрлек тойғолары тәрбиәләр  тип ышанам. Ошо изге эште башлап һәм атҡарып сыҡҡан һәр кемгә оло рәхмәтемде еткерәм. Илебеҙ тыныс, күктәребеҙ аяҙ, халҡыбыҙ берҙәм булһын», — тип яҙҙы Бөрйән районы хакимиәте башлығы.

«Башинформ» агентлығы хәбәр иткәнсә, һәйкәл кенотаф — символик ҡәбер рәүешендә эшләнгән, сөнки батырҙы ерләнгән урыны билдәһеҙ.

https://www.bashinform.ru/news/culture/2022-08-09/v-bashkirii-otkryli-memorialnyy-kompleks-aldar-batyru-2903328