Айгөл Әхмәтшина Францияла музыка фестивалендә «Золушка» операһында йырлай

ӨФӨ, 2017 йыл, 16 ғинуар. /«Башинформ» мәғлүмәт агентлығы, Ләйлә Аралбаева/. Башҡортостан йырсыһы Айгөл Әхмәтшина Францияла музыка фестивалендә Дж. Россиниҙың «Золушка» операһында төп партияны башҡара. Ул халыҡ-ара йырсылар составында Рәсәйҙән берҙән-бер ҡатнашыусы буласаҡ. Мәғлүмәт сараның рәсми сайтында баҫылған.

«Опера де Боже» музыка фестивале Францияның Анжу провинцияһында йыл һайын ойошторола. «Золушка» операһының премьераһы 30 июлгә, 3 һәм 6 авгусҡа билдәләнгән. Сараның музыкаль етәксеһе — Европала билдәле дирижерҙарҙың береһе Константинос Диминакис, художество етәксеһе — Бернадетт Гримметт. Операла төп ролдәрҙе төрлө илдәрҙән йыйылған йырсылар башҡара. Принц Рамиро — тенор Тристан Стокс, Дон Маньифико — бас Стивен Кеннеди, Алидоро — бас Николас Мериуэзер.

Айгөл Әхмәтшина — халыҡ-ара конкурстар лауреаты, Лондонда Ковент-Гарден йәштәр программаһында ҡатнашыусы.