Анна Цивилева һәм Радий Хәбиров МХО ветерандарына автомобиль асҡыстары тапшырҙы

Өфөгә эш сәфәре менән Рәсәй Федерацияһының оборона министры урынбаҫары, «Ватанды һаҡлаусылар» махсус хәрби операцияла ҡатнашыусыларға ярҙам буйынса дәүләт фонды рәйесе Анна Цивилева килде. Уның МХО-ла ҡатнашыусыларҙың ғаиләләре өсөн «Рәсәйҙең ҡатын-ҡыҙ йөрәге» Бөтә Рәсәй ижади фестиваль-конкурсының финалында ҡатнашыуы һәм бер нисә объектҡа барыуы көтөлә.

Бөгөн, 24 мартта, Өфөлә Рәсәйҙең оборона министры урынбаҫары, «Ватанды һаҡлаусылар» махсус хәрби операцияла ҡатнашыусыларға ярҙам буйынса дәүләт фонды рәйесе Анна Цивилева һәм Башҡортостан Башлығы Радий Хәбиров МХО ветерандары Ренат Ғилметдиновҡа, Айрат Нуриевҡа, Вильмир Килмәмәтовҡа, Илнур Гәрәевкә һәм Илшат Әлимғужинға актив коляскалар һәм ҡул менән идара ителгән автомобилдәр асҡыстары тапшырҙы.

«Беҙҙең дәүләттең терәге һәм өмөтө булып торған егеттәр менән сафта тороу – минең өсөн оло мәртәбә. Һеҙ дәүләтте яҡлауҙа беренселәрҙән булдығыҙ, шуның өсөн алдығыҙҙа баш эйәбеҙ. Коллегаларыма, фондтың социаль координаторҙарына, хеҙмәткәрҙәренә лә рәхмәт әйткем килә. Республика Башлығы етәкселегендәге төбәк командаһына рәхмәт белдерәм. «Ватанды һаҡлаусылар» фондының маҡсаты – һеҙ үҙегеҙҙе мөмкин тиклем яҡшы тойһон өсөн һеҙгә ярҙам итеү, таяныс булыу», – тине Анна Цивилева.

«Республика өсөн махсус хәрби операцияға, МХО-ла ҡатнашыусыларға һәм уларҙың ғаиләләренә ярҙам итеүҙән дә мөһимерәк бурыс юҡ. Беҙ һеҙҙең алда бурыслыбыҙ, һеҙҙең менән һоҡланабыҙ һәм, әлбиттә, һәр саҡ ярҙам итербеҙ. Хәрби хеҙмәтегеҙ өсөн республикабыҙ исеменән рәхмәт һүҙҙәрен еткерәм», – тип билдәләне Радий Хәбиров.

https://www.bashinform.ru/news/svo/2026-03-24/v-ufe-vruchili-klyuchi-ot-kolyasok-i-avto-s-ruchnym-upravleniem-veteranam-svo-4625411