Республикабыҙҙан МХО ветераны Ватанды һаҡлаусыларҙың йәйге кубогына әҙерләнә

Мишкә районынан МХО ветераны Рәмил Сәлихов Ватанды һаҡлаусыларҙың йәйге кубогына әҙерләнә. «Ватанды һаҡлаусылар» фондының төбәк филиалы мәғлүмәте буйынса, ул пауэрлифтинг һәм бысаҡ һелтәү дисциплиналарында сығыш яһай.

«Бала саҡтан спорт менән дуҫ булдым. Ярыштарҙа беренсе тапҡыр ҡатнашам, бысаҡ һелтәүҙе һайланым. Үҙемде һынап ҡарарға теләйем, бәлки, оҡшап китер», – ти  ветеран.

Рәмил Сәлихов 2023 йылдың ноябрендә махсус операция биләмәһенә хеҙмәт итергә китә. Донецк Халыҡ Республикаһы, Луганск Халыҡ Республикаһы, Запорожье һәм Херсон өлкәләре территорияһында хәрби бурыстарҙы үтәй. Ҡаты яраланғандан һуң тыуған районына ҡайта.

«Ватанды һаҡлаусылар» фондының социаль координаторы Олеся Йосопова ветеранға тейешле социаль ярҙам сараһын һәм түләү алырға ярҙам иткән. Республика етәкселеге яғынан хәстәрлек һәм иғтибар тойола, тип һөйләй герой. Сәлихов тыуған ауылының белем усаҡтарында ойошторолған патриотик сараларҙа әүҙем ҡатнаша. Хәҙер спортта уңыштарға ирешергә тигән маҡсат менән йәшәй.

https://www.bashinform.ru/news/svo/2025-08-13/veteran-svo-iz-bashkirii-gotovitsya-k-letnemu-kubku-zaschitnikov-otechestva-4347298