Башҡортостанда призывниктарҙың Курск өлкәһенә ебәрелеүе хаҡындағы хәбәрҙе инҡар иттеләр

Ошо көндәрҙә WhatsApp мессенджерындағы ҡайһы бер чаттар һәм каналдар Өфөләге йыйылыу пунктында хәрби хеҙмәткә саҡырылыусыларҙың Курск өлкәһенә ебәрелеүе хаҡында ялған мәғлүмәт баҫтырҙы. Баш ҡала йыйылыу пунктына 312 призывникты йыйғандар, насар шарттарҙа тоталар, уларҙы Курск йүнәлешенә ебәрергә йыйыналар, тиелә унда. Мәғлүмәттәр ябыҡ чаттар буйлап таралған.

Башҡортостан хәрби комиссариатының граждандарҙы хәрби хеҙмәткә әҙерләү һәм саҡырыу бүлеге начальнигы Спартак Джикаев әйтеүенсә, әрмегә саҡырылыусылар махсус операция зонаһына, шулай уҡ Курск өлкәһенә ебәрелмәйәсәк.

– Интернетта таралған яҙманы уҡып сыҡтым. Был ялған мәғлүмәт, ысынбарлыҡҡа тап килмәүен тулы яуаплылыҡ менән әйтә алам. Атап әйткәндә, октябрь айында 800-ҙән ашыу кешене хеҙмәт итеү урындарына оҙаттыҡ, егеттәр Мәскәү, Һамар, Саратов һәм Ленинград өлкәләрендә, шулай уҡ Ростов өлкәһенең көньяҡ өлөшөндә хеҙмәт итә. Башлыса — Үҙәк федераль округ. Курск өлкәһенә октябрҙә лә, ноябрҙә лә оҙатыу планлаштырылманы, — тип билдәләне Джикаев.

Ялған хәбәрҙә күрһәтелгән Өфө йыйылыу пунктында тыныс мөхит, егеттәр хәрби частарға тәғәйенләнгәндән һуң юлға әҙерләнә. Призывниктар әйтеүенсә, йыйылыу пунктында йәшәү шарттары яҡшы.

«Мин Дзержинскиға хеҙмәт итергә барам. Бында 7 ноябрҙән бирле йәшәйем. Барыһы ла яҡшы. Тәмле ашаталар. Төшкө ашҡа салат, һурпа, өҫтәп ҡарабойҙай йә макарон бирәләр», — тип билдәләне хәрби хеҙмәткә саҡырылыусыларҙың береһе Илнар Фазлыев.

– Бөгөн кис юлға сығабыҙ, Мәскәү өлкәһендә Милли гвардияла хеҙмәт итәсәкмен. Ата-әсәйҙәр, һәр ир-егеткә хеҙмәт итергә кәрәк, тиҙәр. Бөтә ир-егеттәр ҙә быны үтергә тейеш, – тине Радмир Баязғолов.

Алдан «Башинформ» хәбәр итеүенсә, көҙгөһөн Башҡортостандан хәрби хеҙмәткә 4 меңдән ашыу кеше алынасаҡ. Призывниктар Ҡораллы Көстәрҙең бөтә тармаҡтарын һәм бүлексәләрен, шулай уҡ башҡа федераль башҡарма органдарҙың хәрби частарын тулыландырасаҡ. Шул уҡ ваҡытта хәрби хеҙмәткә саҡырылыусылар махсус хәрби операция зонаһында хеҙмәт итмәйәсәк.

https://www.bashinform.ru/news/social/2024-11-12/voenkomat-bashkirii-oproverg-feyk-ob-otpravke-prizyvnikov-v-kursk-4004542