Стәрлетамаҡта яугирҙың йортона «аҡыллы кухня» урынлаштырғандар

Стәрлетамаҡ районында махсус хәрби операцияла яраланып ҡайтҡан яугирҙың йортона «аҡыллы кухня» урынлаштырғандар. Хәҙер күреү һәләтен юғалтҡан МХО ветераны хәүефһеҙ һәм уңайлы шарттарҙа йәшәй. 

Алғы һыҙыҡтан ауыр йәрәхәттәр менән ҡайтҡан ҡаһармандарыбыҙға ярҙам итеү – беҙҙең төп бурысыбыҙ, тип хәбәр итә «Ватан һаҡсылары» фондының республика филиалы етәксеһе Гөлнур Ҡолһарина.

– Республиканың бөтә райондарында һәм ҡалаларында социаль координаторҙарыбыҙ эшләй. Стәрлетамаҡ районында Альбина Мортазина ветерандарға һәм һәләк булған яугирҙарҙың ғаиләләренә һәр яҡлап ярҙам күрһәтә. Беҙҙең белгесебеҙгә яра алыу һөҙөмтәһендә күреү һәләтен юғалтҡан ветеран мөрәжәғәт иткән. Махсус комиссия уның тикшергәндән һуң, үткән аҙнала йортона яңы аш-һыу бүлмәһе һәм «Умный дом» системаһы ҡуйылды. Хәҙер яугир йортондағы ҡорамалдар менән планшет йәки смартфон аша тауыш ярҙамында идара итә ала. Шулай уҡ батырыбыҙҙы техник реабилитация сараһы смарт-трость менән тәьмин итә алдыҡ, – тип белдерҙе Гөлнур Ҡолһарина.

Яугирҙың йортонда махсуслаштырылған эш урыны, сәғәт, әйберҙәрҙе билдәләү өсөн ҡорамал (Алиса станцияһы), робот-пылесос, төтөн тураһында хәбәр итеүсе ҡорамал, Брайль шрифты менән яҙыу машинкаһы һәм уны ҡулланырға өйрәтеү өсөн махсус ҡорамалдар, аш-һыу әҙерләү һәм ашау өсөн һауыт-һаба һәм стендтар, дозаторҙар һәм шыйыҡса кимәле күрһәткестәре, шулай уҡ башҡа төрлө йыһаздар – уңайлы шарттарҙа йәшәү өсөн бөтә әйбер бар.

Шуны билдәләргә кәрәк, «Ватанды һаҡлаусылар» дәүләт фонды ветеранды «Аҡыллы йорт» системаһы һәм бөтә кәрәкле ҡорамалдар менән бушлай тәьмин иткән.