Башҡортостан халҡы фронтҡа өс машина һәм дрон детекторҙары ебәрҙе

Хәйбулла районынан МХО зонаһына сираттағы гуманитар ылау юлға сыҡты. Район халҡы яугирҙарға ике «УАЗ» һәм бер «Нива» автомобилдәре,  радио-электрон көрәш сараһы, «Булат-4» ҡулайламалары, генераторҙар, шөрөп борғостар, иретеп-йәбештереү аппараты, бензин бысҡылары, маскировкалау селтәрҙәре, миндектәр, портатив газ плитаһы, шәхси гигиена, көнкүрештә ҡулланырға кәрәк-яраҡтар, аҙыҡ-түлек (тушенкалар, салаттар, тоҙламалар, картуф), кейемдәр һәм яугирҙарға ҡатмарлы шарттарҙа кәрәкле башҡа әйберҙәр оҙатты.

«Ғаилә» үҙәге белгесе Филүзә Ишемғолова «Башинформ»ға һөйләүенсә, гуманитар ылауҙы район башлығы Рөстәм Шәрипов үҙе оҙатып бара. 

– Гуманитар ылау менән бергә 25 маскировка селтәре ебәрҙек, ауыл халҡы аҙыҡ-түлек, быҡтырылған ит һәм салаттар һалды. Мәскәүҙән Дмитриевтар ғаиләһе ҙур өлөш индерҙе, улар беҙгә 196 мең һумлыҡ ярҙам ебәрҙе. Һалдаттарҙың һорауы буйынса бөтә кәрәк-яраҡтарҙы һатып алдыҡ, – тине Филүзә Ишемғолова. 

Райондың «Туған тыл» ирекмәндәр берекмәһе яугирҙарға окоп шәмдәре әҙерләгән. 

– Беҙҙең район үҙәгендә окоп шәмдәре производствоһы, теген цехы булдырылған. Бөгөн МХО биләмәһендә иң кәрәклеһе – ул дронға ҡаршы юрғандар, беҙ уларҙы егеттәрҙең үтенесе буйынса тегә башланыҡ. Шулай уҡ үҙебеҙ теккән балаклаваларҙы, тактик носилкаларҙы ебәрҙек, – тип һөйләне ирекмәндәр берекмәһе етәксеһе Юлиә Ғәлиева.

Башҡортостандың Урал аръяғы төбәге халҡы махсус хәрби операция яугирҙәренә әүҙем ярҙам күрһәтә. Баймаҡ районы төҙөлөш материалдары, аҙыҡ-түлек, дарыуҙар һәм башҡа кәрәк-яраҡтар менән 26 гуманитар йөк оҙатты. «Башинформ» шулай уҡ Ейәнсура районынан ағалы-энеле өс бер туғандың махсус хәрби операция биләмәһенә юлланыуы хаҡында хәбәр иткәйне.

https://www.bashinform.ru/news/svo/2024-11-07/zhiteli-bashkirii-otpravili-na-front-tri-mashiny-i-detektory-dronov-3999008