Башҡортостандан спорт ветерандары Абу-Дабиҙа үткән Европа уйындарында еңеү яуланы

Илеш районы спортсылары Илүсә һәм Вәсил Хөснөтдиновтар Берләшкән Ғәрәп Әмирлектәренең баш ҡалаһында уҙған Европа уйындарында уңышлы сығыш яһаны. Турнир тиҫтәләгән илдән 25 меңдән ашыу көслө спортсыны берләштерҙе. Республикабыҙҙан спорт ветерандарының еңеүе тураһында район етәксеһе Илдар Мостафин хәбәр итте.

Илүсә Хөснөтдинова 10 һәм 5 мең метрға йүгереүҙә алтын миҙалдар яуланы, 3 мең метрға атлауҙа икенсе булды. Рәсәй командаһы составында ул шулай уҡ 4×100 һәм 4×400 метр ҡатын-ҡыҙҙар эстафетаһында ике алтын миҙал алды.

Вәсил Хөснөтдинов 4×400 метр һәм 4×100 метр ир-егеттәр эстафетаһында чемпион һәм бронза призер исеменә лайыҡ булды.

«Ошо триумфаль сығыштың һөҙөмтәһе – 7 миҙал, шуларҙан 5 алтын, 1 көмөш һәм 1 бронза. Был еңеүҙәр –  спортты һәм үҙенең тыуған төйәген яратҡан кеше өсөн мөмкинлектәрҙең киң булыуына сағыу дәлил», — тип билдәләне Мостафин.

Хәбәр иткәнебеҙсә, Башҡортостан дзюдосылары Абу-Дабиҙа миҙалдар яуланы.

https://www.bashinform.ru/news/sport/2026-03-12/veterany-sporta-iz-bashkirii-pokorili-evropeyskie-igry-v-abu-dabi-4611231