Мәскәүҙә Башҡортостан Рәсәйҙең иң яҡшы спорт төбәге тип танылды

Башҡортостан Рәсәйҙең иң яҡшы спорт төбәге тип танылды. Мәскәүҙә Милли спорт премияһы еңеүселәрен бүләкләү тантанаһы уҙҙы. Рәсәйҙең спорт министры Михаил Дегтярев Башҡортостан Башлығы Радий Хәбировҡа еңеүсе дипломын тапшырҙы.

Был еңеү — спортсыларҙың һәм уларҙың остаздарының, власть органдары вәкилдәренең уртаҡ тырышлығы һөҙөмтәһе, тип билдәләне республика етәксеһе. Шулай уҡ республикабыҙҙа спортты ихлас яратҡан һәм уға әүҙем ярҙам иткәндәрҙең барыһының да.

«Был награданы ҡыуаныслы хистәр менән өйгә алып ҡайтырмын һәм уға ҡатнашы булғандарға тапшырырмын. Улар – тренерҙар, методистар, физкультура уҡытыусылары, бөйөк спортсыларыбыҙ һәм спорт менән яңы шөғөлләнә башлаған малайҙар, ҡыҙҙар. Беҙ, үҙ сиратыбыҙҙа, балаларҙың спорт менән шөғөлләнеү мөмкинлеге, заманса физкультура-һауыҡтырыу комплекстары, бассейндар, спорт һарайҙары булһын өсөн эшләйбеҙ. Михаил Владимирович, ҙур рәхмәт. Беҙ Спорт министрлығы командаһы менән килешеп эшләйбеҙ. Был эште лә дауам итербеҙ. Ярҙам иткәнегеҙ өсөн рәхмәт һәм барыһына ла шатлығыбыҙҙы уртаҡлашҡан өсөн рәхмәт белдерәм», — тине Радий Хәбиров.

Республика быйыл тағы ике номинацияла өс призер иҫәбенә инде. Фехтование буйынса олимпия резервындағы спорт мәктәбе – «Иң яҡшы спорт мәктәбе» номинацияһында, ә «Башҡортостандың адаптив спорт үҙәге» спорт мәктәбе «Рәсәй өмөтө: иң яҡшы спорт мәктәбе, иң яҡшы адаптив спорт ойошмаһы» номинацияһында билдәләнде.

Быйыл «Рәсәй төбәге» номинацияһында Башҡортостан менән бергә Татарстан һәм Хабаровск крайы ла еңеүгә дәғүә итте.

https://www.bashinform.ru/news/sport/2025-11-27/bashkiriyu-v-moskve-priznali-luchshim-sportivnym-regionom-rossii-4484627