Башҡортостан спортсылары өҫтәл теннисы буйынса Рәсәй кубогында 8 миҙал яуланы

Ҡурған өлкәһендә аҡыл үҫеше яғынан артта ҡалған спортсылар араһында өҫтәл теннисы буйынса Рәсәй кубогы уҙҙы. Унда илдең 15 төбәгенән 66 спортсы ҡатнашты.

Башҡортостандың адаптив спорт үҙәгенән хәбәр итеүҙәренсә, республикабыҙ спортсылары 3 алтын, 3 көмөш һәм 2 бронза миҙалға лайыҡ булды. Яңғыҙ разрядта Елена Прокофьева — алтын, Өфөнән Линар Вәкилов — көмөш, Марина Соловьева, Александр Емельянов бронза наградалар яуланы.

Ҡатын-ҡыҙҙар командалары араһында беренсе урынды Башҡортостан йыйылмаһы алды (Наҙгөл Байғужина, Елена Прокофьева, Марина Соловьева). Парлы разрядта ла беҙҙең спортсыларға тиңдәр булманы: Марина Соловьева һәм Елена Прокофьева алтын, Александр Емельянов һәм Елена Прокофьева, Даниил Иванов һәм Линар Вәкилов көмөш миҙалдарға лайыҡ булды.

Бынан алдараҡ «Башинформ» Башҡортостандың спортты һәм физкультураны үҫтереү буйынса чемпион булыуы тураһында хәбәр иткәйне.

https://www.bashinform.ru/news/sport/2024-11-21/sportsmeny-iz-bashkirii-zavoevali-8-medaley-na-kubke-rossii-po-nastolnomu-tennis-4018651