Башҡортостан Башлығы Республикаға идара итеү үҙәгендәге аҙналыҡ оператив кәңәшмәлә спорт министрлығына Ҡазанда уҙған БРИКС илдәренең халыҡ-ара мультиспорт уйындары еңеүселәре һәм призерҙары менән осрашыу ойошторорға ҡушты. Унда Башҡортостан спортсылары 12 алтын, 7 көмөш һәм бер бронза миҙал яуланы.
«Егеттәребеҙ яҡшы сығыш яһаны. Мин улар менән осрашып, аралашыр инем. Бындай осрашыуҙар юғары ҡаҙаныштар спортын үҫтереүгә этәргес бирә. Бүләкләү өсөн исемлек әҙерләгеҙ», — тине Радий Хәбиров.