Өфөлә Фехтование үҙәге быйыл көҙ файҙаланыуға тапшырыла

Өфөлә баш ҡаланың 450 йыллыҡ юбилейы уңайынан ҙур спорт объекттары төҙөлә. Затон биҫтәһендә Рима Баталова исемендәге Спорт әҙерлеге үҙәге янында Фехтование үҙәге асыла. Дөйөм майҙаны 6 мең квадрат метрҙан ашыу тәшкил иткән объект йыл аҙағына тиклем тапшырылырға тейеш. Бөгөн, 15 майҙа, Башҡортостан Башлығы Радий Хәбиров төҙөлөш барышы менән танышты.

Хәтерегеҙгә төшөрәбеҙ, 2022 йылдың 15 декабрендә республика етәксеһе яңы спорт объекты нигеҙенә һынау свайын ҡағыу тантанаһында ҡатнашты.

«Өфөнөң инвестиция-төҙөлөш комитеты» акционерҙар йәмғиәтенең генераль директоры Марат Вәсимов һүҙҙәренсә, бинала төп төҙөлөш эштәре тамамланған, бында төҙөүселәр фасад һәм биҙәкләү эштәренә тотонған.

Шулай итеп, 42х24 метр ҙурлығындағы универсаль спорт залында фехтование өсөн 8 юл була. Юғары кимәлдәге турнирҙарҙы тап ошонда үткәрергә мөмкин. Объектта шулай уҡ махсус спорт залы, шәхсән шөғөлләнеү өсөн тренажер һәм спорт залдары бар. Трибуналар 373 урынға иҫәпләнгән. Бында гардероб, тренерҙар, комментаторҙар, судьялар бүлмәһе, душ инеү, сисенеп-кейенеү урындары була. Бынан тыш, Фехтование үҙәгендә ҙур булмаған бассейн, буфет, конференц-зал һәм спорт тауарҙары магазины ҡаралған. Төҙөүселәр эштәрҙе йәй аҙағына тамамлап, көҙ көнө Фехтование үҙәген сафҡа индерергә вәғәҙәләй. Уны Өфөлә «Рәсәй – спорт державаһы» халыҡ-ара форумы барышында асыу күҙаллана. Ә декабрҙә бында фехтование буйынса тәүге ярыштар ойошторола.

«Ошондай ҙур спорт объектын төҙөүгә күңел шатлана. Олимпия чемпиондары Аделина Заһиҙуллина менән Тимур Сафин, тренерҙар миңә мөрәжәғәт иткәс, 300 миллионға бәләкәй үҙәк төҙөрбөҙ тип уйлағайным. Был инде миллиард һумға барып баҫты. Ауыр бирелә, әммә объект бөтөнләй икенселәй килеп сыҡты. Рәсәйҙә ошондай ике фехтование үҙәге бар. Мәскәү өлкәһендә һәм Новосибирскиҙа. Икеһе лә күренекле спортсыларҙың исемен йөрөтә. Беҙҙекенә билдәле тренер Рәмил Әйүповтың исеме бирелә. Был Рәсәй Федерацияһында иң яҡшы фехтование үҙәге булыр, моғайын», - тип билдәләне Радий Хәбиров, «Башинформ» мәғлүмәт агентлығы журналисының һорауына яуап биреп.

https://www.bashinform.ru/news/sport/2024-05-15/tsentr-fehtovaniya-v-ufe-sdadut-osenyu-tekuschego-goda-3766803