Өфө рапирасыһы, өс тапҡыр Европа чемпионы, Олимпия уйындары еңеүсеһе Тимур Сафин фехтование буйынса Рәсәй чемпионатының бронза призеры булды, тип хәбәр иттеләр республиканың Спорт министрлығынан. Турнир Пермь өлкәһенең Кондратово ауылында бара.
Беренсе көндә Кирилл Бородачев еңеү яуланы. Игеҙәк туғаны Антон унан бер аҙ ҡалышты. Иртәгә рапира ярыштарында ҡатын-ҡыҙҙар ҡатнаша, улар араһында Өфөнән Аделина Заһиҙуллина ла бар.
2 апрелдә башланған ярыштар 9 апрелгә тиклем бара. Турнирҙа 26 төбәктән 500-ҙән ашыу спортсы ҡатнаша. «Красава» спорт һарайы юлдарына илдең иң яҡшы спортсылары, Олимпия уйындары, донъя һәм Европа чемпионаттары, халыҡ-ара һәм Рәсәй турнирҙары чемпиондары һәм призерҙары, шулай уҡ өмөтлө спортсылар сыҡты. Йәмғеһе 12 комплект миҙал уйнатыла.