Өфө дзюдосыһы Матвей Каниковский Халыҡ-ара дзюдо федерацияһының Португалия гран-прийы чемпионы титулына лайыҡ булды. Спортсының Одивелашта уҙған халыҡ-ара турнирҙа еңеүе тураһында Башҡортостандың Спорт министрлығынан хәбәр иттеләр.
Матвей Каниковский 100 килограмға тиклемге ауырлыҡ категорияһында сығыш яһаны. Финалда яҡташыбыҙ ике тапҡыр донъя чемпионы, Европа-2023 чемпионатының бронза призеры Николоз Шеразадишвилиҙы (Испания) еңде.
Әйткәндәй, Португалияла уҙған гран-при этабы 2024 йылғы Олимпиадаға (Париж) һайлап алыу турниры булып тора.
Бынан алдараҡ Башҡортостан көрәшсеһе Дамир Таһиров Саранскиҙа грек-рим көрәше буйынса округ турнирында алтын миҙал яуланы. Республика көрәшселәре Эдгар Шерстобитов, Николай Турбин һәм Ратмир Ғәлимйәнов та бронза миҙалдар менән ҡайтты, тип хәбәр иткәйне «Башинформ» мәғлүмәт агентлығы.