2024 йылда республикала «Ҡала тренеры» проекты эшләй башлай

Башҡортостанда 2024 йылда «Ҡала тренеры» проектын ғәмәлгә ашырыу башлана. Бөгөн Башҡортостан Башлығы Радий Хәбиров республика Дәүләт Йыйылышына йыллыҡ мөрәжәғәтнамәһендә ошо хаҡта белдерҙе.

«Абруйлы чемпионаттарҙа еңеү яулаған спортсыларҙы һәм тренерҙарҙы дәртләндереү өсөн махсус дәүләт стипендияларын булдырҙыҡ (30 мең һум). Хәҙер уны 73 спортсы һәм тренер ала. «Ауыл тренеры» проекты сиктәрендә түләүҙең күләмен 600 меңдән миллионға тиклем арттырҙыҡ. 2024 йылда «Ҡала тренеры» проектын башлайбыҙ», — тине Радий Хәбиров.

Киләһе этапта яңы быуын чемпиондар әҙерләү өсөн олимпия резервы училищеһын асабыҙ, тип билдәләне республика етәксеһе.

Хәтерегеҙгә төшөрәбеҙ, «Ҡала тренеры» программаһын ғәмәлгә ашырыу мәсьәләһе быйыл июль айында Башҡортостан хөкүмәте ултырышында ҡаралды, тип хәбәр иткәйне «Башинформ» мәғлүмәт агентлығы. Унда 100 меңдән ашыу кеше йәшәгән ҡалаларҙа (Өфө, Стәрлетамаҡ, Салауат, Нефтекама, Октябрьский) «Ауыл тренеры» проекты кеүек программа талап ителеүе билдәләнде. Был проект ҡалаларҙа эшләмәй, ә тренерҙарға ихтыяж бар.

https://www.bashinform.ru/news/sport/2023-12-19/v-bashkirii-v-2024-godu-zapustyat-proekt-gorodskoy-trener-3573830