Республика спортсылары Өфөлә грек-рим көрәше буйынса Рәсәй беренселегендә тәүге миҙалдар яуланы

Башҡортостан спортсылары Эдгар Шерстобитов һәм Салмон Тошов грек-рим көрәше буйынса Рәсәй беренселегенең көмөш призерҙары булды, тип хәбәр иттеләр «Башинформ» мәғлүмәт агентлығына республиканың Спорт министрлығынан.

Эдгар Шерстобитов (тренеры Е.В. Журавлёв) алышта Дағстан вәкиле Солтан Йосоповтан (32 кг ауырлыҡ категорияһы), ә Салмон Тошов (тренерҙары Г.В. Симонов һәм В.П. Коробов) финалда Мәскәү спортсыһы Данил Ложкиндан еңелде (48 кг ауырлыҡ категорияһы).

Хәтерегеҙгә төшөрәбеҙ, Өфөлә СССР-ҙың атҡаҙанған тренеры Владимир Алексеевич Борман иҫтәлегенә 37-се турнир ярыштары башланды. Башҡортостандың баш ҡалаһында грек-рим көрәше буйынса Рәсәй беренселегендә 16 йәшкә тиклемге спортсылар көс һынаша. Рима Баталова исемендәге спорт әҙерлеге үҙәгендә 15 ауырлыҡ категорияһында алыштар бара.

https://www.bashinform.ru/news/sport/2023-05-26/sportsmeny-iz-bashkirii-zavoevali-pervye-medali-pervenstva-rossii-po-greko-rimskoy-borbe-v-ufe-3273463