Ненад Лалович: Башҡортостанда спорт көрәше традициялары бик көслө

«Ниһайәт, илебеҙҙә ошо сағыу спорт ваҡиғаһын уҙғарыуҙы көтөп алдыҡ, – тине Радий Хәбиров. – Ике йыл көрәш буйынса донъя чемпионаты үткәрелмәне. Юниорҙар араһында Беренселек иһә Рәсәйҙә тәүгә ойошторола. Уны үткәреү урыны итеп Башҡортостандың һайланыуы – беҙҙең өсөн оло хөрмәт һәм ҙур яуаплылыҡ. Донъяның 55 иленән 1 000 атлетты ҡаршы алырға оҙаҡ һәм ныҡлы әҙерләндек».

«Беҙ күп төҙөйбөҙ: Өфөлә Гимнастика үҙәге, футбол майҙаны төҙөлөшөн тамамлап киләбеҙ, Спорт көрәше үҙәген төҙөү эшенә тотонабыҙ, Волейбол үҙәге проектын әҙерләнек, Фехтование һарайын планлаштырабыҙ. Ошондай спорт объекттары – атлеттарыбыҙҙың еңеүенә хөрмәт билдәһе, – тине Радий Хәбиров. – Быйыл ике боҙ стадионы төҙөйбөҙ, ә 2024 йылға 16 район үҙәгендә бассейндар асабыҙ. Был ҡоролмалар бик мөһим, сөнки Башҡортостан халҡында сәләмәт йәшәү рәүешенә, физкультура һәм спорт менән шөғөлләнеүгә ихтыяж ҙур».

«Рәсәйҙә ошондай күләмле турнир тәүгә уҙғарыла. Был осраҡлы түгел, сөнки Башҡортостанда спорт көрәше традициялары бик көслө», – тине Ненад Лалович.

«Өс йылдан бөгөн Өфө келәмдәрендә сығыш яһаған көрәшселәр Париждағы Олимпиадала үҙ илдәренең милли йыйылма командалары намыҫын яҡлаясаҡ. Беҙ әле үк буласаҡ олимпия чемпиондарын таный алабыҙ, – тине Михаил Мамиашвили. – Башҡортостанға килгәндә, бында совет заманынан уҡ ҡеүәтле көрәш мәктәбе йәшәп килә. Билдәле тренер Владимир Борман байтаҡ чемпиондар һәм призёрҙар тәрбиәләне. Хәҙер республика етәксеһе Радий Хәбировтың мәктәптәргә көрәште индереү менән шөғөлләнеүе оло әһәмиәткә эйә».