Шамил Ғәзизов – «Өфө» клубының генераль директоры

«Өфө» футбол клубы директорҙар советының ултырышы тамамланды. Унда клубтың турнир таблицаһындағы хәленең ҡәнәғәтләнерлек булмауы һәм быны нисек төҙәтеү тураһында һүҙ барҙы. Шулай уҡ яңы генераль директор тәғәйенләү хаҡында ҡарар ҡабул ителде. Ул – Өфө көйәрмәндәренә яҡшы таныш булған Шамил Ғәзизов.

— Һуңғы ун йылда клубтың барлыҡ еңеүҙәре һәм уңыштары – Шамил Камил улының хеҙмәте. Бер кем дә унан яҡшыраҡ булдыра алмай. Клубтың әлеге етәксеһенә дәғүәләр юҡ, объектив финанс йәһәтенән ҡатмарлыҡтар килеп тыуҙы. Беҙ еңел булмаған осорҙа клубҡа ҡайтырға хәл иткәне өсөн Шамилға бик рәхмәтлебеҙ. Уның алдына Премьер-лигала ҡалыу һәм Рәсәй кубогында уңышлы сығыш яһау бурысын ҡуябыҙ, — тине директорҙар советы рәйесе Ростислав Мырҙағолов.

— Ошо юғары һөҙөмтәгә беҙ бергәләп өлгәштек, еңел булмаған хәлдән бергәләп сығырбыҙ. Тәү сираттағы бурысым - эшләү! — тине Шамил Ғәзизов.