Ростислав Мырҙағолов «Өфө» футбол клубының Попечителдәр советы рәйесе итеп тәғәйенләнде

ӨФӨ, 2018 йыл, 21 декабрь. /«Башинформ» мәғлүмәт агентлығы/. «Башинформ» акционерҙар йәмғиәтенең Директорҙар советы рәйесе Ростислав Мырҙағолов «Өфө» футбол клубының Попечителдәр советы рәйесе итеп тәғәйенләнде. Попечителдәр органын булдырыу тураһында ҡарар 11 декабрҙә клубты үҫтереү мәсьәләләре буйынса эш кәңәшмәһендә ҡабул ителде. «Өфө» футбол клубы» автономлы коммерцияға ҡарамаған ойошмаһының генераль директоры Шамил Ғәзизовҡа 2019 йылдың 31 ғинуарына тиклем Попечителдәр советының эш планын һәм концепцияһын әҙерләү бурысы йөкмәтелде. Ул дәүләт органдары менән үҙ-ара эш итеү өсөн дә яуаплы.

«Бөтә эште элеккесә клуб менеджменты алып бара, сөнки ул миҙгелде 1 миллиард һумға 6-сы урында ябып, юғары эш һөҙөмтәлелеген раҫланы, ә 5-се урынды алған команда 11 миллиард тотондо», — тип билдәләне Ростислав Мырҙағолов.

«Биш-алты кешенән торған Попечителдәр советы стратегик мәсьәләләр, ярҙам, ҡарарҙарҙың үтәлешен күҙәтеү менән шөғөлләнергә тейеш. «Салауат Юлаев» хоккей клубында бындай орган бар. Был футбол өсөн дә һәйбәт булыр тип уйлайым», — тине Шамил Ғәзизов.