2018 йылда төп спорт төрҙәрен үҫтереүгә Башҡортостанда 87 миллион һум бүленгән

ӨФӨ, 2018 йыл, 12 июль. /«Башинформ» мәғлүмәт агентлығы, Наталья Овчарук/. 84 республика федерацияһы үҙ спорт төрҙәрен үҫтереү буйынса программалар әҙерләгән. Башҡортостандың Йәштәр сәйәсәте һәм спорт министрлығы менән 42 документ, уларҙан төп спорт төрҙәре буйынса 23 проект килешеү үткән дә инде.

«Төп спорт төрҙәрен үҫтереүгә Башҡортостан Хөкүмәтенең 2018 йылдың 3 июлендәге бойороғо менән 87 миллион һум бүленгән, — тип билдәне республиканың йәштәр сәйәсәте һәм спорт министры вазифаһын башҡарыусы Руслан Хәбибов. – Өҫтәмә финанслау спорт менән шөғөлләнеүселәр һанын 0,9 процентҡа, разряд һәм исем алыусы спортсыларҙы 5,8 процентҡа, милли йыйылмаларға саҡырылғандарҙың иҫәбен 4,2 процентҡа, бөтә Рәсәй һәм халыҡ-ара ярыштар призерҙарын һәм еңеүселәрен 6,7 процентҡа арттырырға мөмкинлек бирә».

Төбәктәге Спорт министрлығында өҫтәмә финанслау менән эште алдағы йылдарҙа ла дауам итергә тәҡдим иттеләр.

Хәтерегеҙгә төшөрәбеҙ, төп спорт төрҙәренә бадминтон, биатлон, бобслей, бокс, велоспорт, тау саңғыһы спорты, байдаркала һәм каноэла ишеү, еңел атлетика, саңғы ике бәйгеһе, йөҙөү, саңғыла трамплиндан һикереү, сноуборд, заманса биш бәйге, спорт көрәше (грек-рим), теннис, ауыр атлетика, фехтование, фристайл, шорт-трек, һаңғырауҙар спорты, һуҡырҙар спорты, ПОДА спорты һәм ЛИН спорты инә.

http://www.bashinform.ru/news/1185371-v-2018-godu-na-razvitie-bazovykh-vidov-sporta-v-bashkirii-vydeleno-87-mln-rubley-/