Башҡортостандан тхэквондо оҫталары Волга буйы федераль округы чемпионатында 14 алтын миҙал яуланы

ӨФӨ, 2018 йыл, 5 апрель. /«Башинформ» мәғлүмәт агентлығы, Әлим Фәйезов/. Һамар ҡалаһында тхэквондо буйынса Волга буйы федераль округы чемпионаты һәм беренселеге һәм Рәсәй Тхэквондо ассоциацияһының төҫлө билбауҙар фестивале үтте. Сарала ҡатнашыусыларға һәм ҡунаҡтарға сәләмләү телмәре менән Рәсәй Тхэквондо ассоциацияһы президенты Дамир Хәлилов, Һамар өлкәһенең спорт министры урынбаҫары Лидиә Рогожинская мөрәжәғәт итте. Ярыштарҙы ойоштороусы Валерий Берков Башҡортостандың Бөтә стилдәге тхэквондо федерацияһы етәксеһе Фәғит Латыповҡа һәм башҡа активистарға «Волга буйы федераль округында тхэквондо үҫешенә ҙур өлөш индергәндәре өсөн» Рәхмәт хаты тапшырҙы.

Башҡортостандың Бөтә стилдәге тхэквондо федерацияһының йыйылма командаһына тхэквондо буйынса республиканың XXVI чемпионаты һәм беренселеге призерҙары һәм еңеүселәре ингән. Беҙҙең республиканан 34 тәрбиәләнеүсе сығыш яһаны. Башҡортостан командаһы 14 беренсе урын, 9 икенсе һәм шунса уҡ өсөнсө урын алды.

Был турнир апрель аҙағында Мәскәүҙә үтәсәк Рәсәй чемпионатына һәм беренселегенә һайлап алыу этабы булды, тип хәбәр иттеләр Башҡортостандың Бөтә стилдәге тхэквондо федерацияһының матбуғат хеҙмәтендә.

http://www.bashinform.ru/news/1139519-mastera-tkhekvondo-iz-bashkirii-zavoevali-14-zolotykh-medaley-na-chempionate-pfo/